Արդեն հայտարարվել է վարչապետի «քասթինգ»

Քաղաքագետ, «Կովկաս» ինստիտուտի տնօրեն Ալեքսանդր Իսկանդարյանը լրագրողների հետ հանդիպմանն անդրադարձավ Հայաստանի ներքին քաղաքական հարցերին և նշեց.«Արդեն հայտարարվել է վարչապետի «քասթինգ», որը կղեկավարի երկիրը հաջորդ տարվա ապրիլից, և կլինի որոշ մրցակցություն՝ պետության ղեկավարի պաշտոնը ստանձնելու համար։ Հասկանալի է, որ դա կլինի ՀՀԿ-ի ներսում, հասկանալի է, որ դրա վրա կազդեն արտաքին  հանգամանքները ևս։ Բայց մնացած ամեն ինչ տեղի կունենա ՀՀԿ-ի ներսում, և այդ մրցակցությունն այս ամբողջ տարվա ընթացքում կշարունակվի»: «Ես քաղաքագետ եմ և մտածում եմ ոչ թե անձերով, այլ կառուցվածքներով։ Կարևորն անձերը չեն, այլ այն, թե ինչպես կանցկացվի մրցակցությունը և ինչպես կավարտվի»,-ասաց նա: Խոսելով ՀՀԿ-ՀՅԴ կոալիցիայի մասին, նա ասաց, որ կոալիցիա կազմելն արդեն ավանդույթ է դարձել մեր երկրում. «Կոալիցիա կազմում են նաև այն ժամանակ, երբ դա հարկավոր չէ։ Դաշնակները քիչ քանակությամբ էին անցել խորհրդարան և լուրջ ազդեցություն ունենալ չէին կարող։ ՀՀԿ-ն որոշեց նրանց հետ կոալիցիա կազմել, որ իշխանությունը կոալիցիոն լինի, և ոչ թե՝ մեկ ուժի կողմից»։