Պուտինն Ալիևին ու Էրդողանին ճնշելու այլ լծակներ է գործի դրել

Մի քանի օր է, ինչ ռուս փորձագետները կարծիք են հայտնում, որ մեկ-երկու օրում, նույնիսկ, մի քանի ժամերի ընթացքում Ռուսաստանը կարող է ջախջախել ադրբեջանական բանակին ու կանգնեցնել Արցախում արյունալի պատերազմը:

Ռազմական ոլորտի մասնագետ նման կարծիք ունի. Երևանն ունի բավարար հիմքեր ՀԱՊԿ-ում դաշնակիցներից օգնություն խնդրելու ադրբեջանական գրոհները զսպելու համար, նման տեսակետ է հայտնել ռազմական փորձագետ, ՌԴ Գլխավոր շտաբի նախկին աշխատակից Կոնստանտին Սիվկովը, գրում է Argumenti.ru-ն:

Սիվկովը նշել է, որ Հավաքական անվտանգության պայմանագրի չորրորդ կետը թույլ է տալիս Հայաստանին աջակցություն ստանալ: Փորձագետի կարծիքով, եթե Մոսկվան միջամտի հակամարտությանը, ապա Ռուսաստանի օդատիեզերական ուժերը ղարաբաղյան բանակի հետ միասին երեք օրվա ընթացքում կարող են ջախջախել Ադրբեջանի զինված ուժերին:

Ադրբեջանական ուժերը երեկ հրթիռակոծեցին Հայաստանի տարածքը: Պաշտոնական Մոսկվան սրան դեռ չի արձագանքել, իսկ ռուսաստանցի ռազմական փորձագետ Վլադիմիր Եվսեևն ասում է, թե Ռուսաստանը կավելացնի իր ճնշումն Ադրբեջանի վրա, եթե ստեղծվի կրիտիկական իրավիճակ Ղարաբաղում, օրինակ` ադրբեջանական ուժերը գրավեն Լաչինը: «Այս պահին նման կրիտիկական իրավիճակ չկա, - ըստ «Ազատության», նշել է փորձագետը, -

Մոսկվան հնարավորինս անում է այսօր Ադրբեջանի հետ հարաբերությունները չխզելու համար և Բաքվին ու Անկարային ճնշելու այլ լծակներ է օգտագործում, օրինակ` ռմբակոծում է ահաբեկիչների ճամբարները Սիրիայի այն տարածքում, որը վերահսկում է Թուրքիան, այն ճամբարները, որտեղից Թուրքիան ահաբեկիչ վարձկաններ է տեղափոխում Ղարաբաղ: Բացի այդ, Ռուսաստանի օգնությամբ հնարավոր է եղել չեզոքացնել ադրբեջանական ուժերի մեծ առավելությունն օդում:

Ռուսաստանը դադարեցրել է ցանկացած ռազմատեխնիկայի մատակարարումն Ադրբեջանին պատերազմը սկսելուց ի վեր, և Ադրբեջանի այն սպառազինությունը, որ գնվել էր Ռուսաստանից, մեծամասամբ սպառվել է, քանի որ դրանք օգտագործելու համար անհրաժեշտ է զինամթերք, իսկ նորը Ռուսաստանը չի տալիս»:

Եվսեևը նաև նշում է, որ Ռուսաստանն իր զորքերը տեղակայել է Հայաստանի և Ղարաբաղի սահմանին: Հիմնական խնդիրը, որն այսօր պետք է անհանգստացնի Հայաստանին, Թուրքիայի հնարավոր մասնակցությունն է պատերազմին, կանոնավոր թուրքական բանակի մասին է խոսքը: Իսկ այս խնդիրը, ռուսաստանցի փորձագետի պնդմամբ, Մոսկվան` որպես Երևանի դաշնակից, այսօր լուծում է, զսպում է Թուրքիային, դժվար թե վերջինս ուզենա պատերազմել Ռուսաստանի դեմ Հարավային Կովկասում, իսկ Մոսկվան հստակ ասել է Անկարային, որ եթե թուրքական զորքերը մտնեն հայ-ադրբեջանական հակամարտության գոտի, ստիպված են լինելու պատերազմել ռուսական բանակի դեմ: Սրա հետ մեկտեղ նույնիսկ հայամետ ռուսաստանցի փորձագետն ասում է, որ Ռուսաստանը չի ուզում պատերազմել Ադրբեջանի դեմ և հնարավորինս կանի, որ պատերազմը չտարածվի նաև Հայաստանի տարածք:

Հիշեցնենք, որ օրերս նաև Սիրիայում ռուսական կողմը ոչնչացրեց թուրքական հովանու ներքո գործող գրոհայինների, շուրջ 100 զոհի ու նույնքան վիրավորների մասին էր խոսք գնում:

Այսօր Էրդողանն արդեն սկսել է բողոքել ռուսական քաղաքականությունից՝ Սիրիայում:
Ըստ ամենայնի, առաջիկայում Պուտին-Էրդողան շփումներում որոշակի սառնություն կարող է նկատվել:

Մետաքսյա Շալունց