Ես երազում եմ, որ օր առաջ Նիկոլ Փաշինյանը հեռանա, սակայն… Ալվարդ Պետրոսյան

ԱԺՄ ղեկավար Վազգեն Մանուկյանն այսօր հայտարարությամբ է հանդես եկել՝ պահանջելով ՀՀ վարչապետ Նիկոլ Փաշինյանի հրաժարականը. «Վտանգված է ոչ միայն Արցախը, այլև Հայաստանը և հայության ապագան։

Կարելի՞ է արդյոք փոխել իրավիճակը, բեկում մտցնել։ Այո՛։ Բայց ոչ ներկա կառավարման օրոք։

Ի՞նչ է պետք անել։

1․ Այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում դա պետք է անի կամավոր, առանց ցնցումների, որոնք կարող են կործանարար լինել։

2․ Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ։

Սա միակ փրկությունն է։ Հակառակ դեպքում մենք կարող ենք կորցնել ամեն ինչ»:

Թեմայի շուրջ զրուցել ենք հայ գրող, արձակագիր, հրապարակախոս Ալվարդ Պետրոսյանի հետ. «Ես երազում եմ, որ օր առաջ Նիկոլ Փաշինյանը հեռանա իշխանությունից, բայց այդ հարցին ռազմական լուծում տալ չի կարելի, որպեսզի հիմա էլ ամբողջ աշխարհը մեղադրի Հայաստանին, որ մեր երկրում ռազմական հեղաշրջում է եղել, ես դա չեմ ընդունում: Բնավ չհամակրելով մեր այսպես կոչված վարչապետին՝ ես չեմ կարծում, որ նա այլևս ազդեցություն ունի հետագա զարգացումների կամ էլ ռազմական ղեկավարության վրա: Ես համբերատար սպասում եմ, որ մեր հերոս ժողովրդի ու մեր հերոս զավակների միջոցով պատերազմն ավարտվի, և դրանից հետո ժողովուրդը թող դատի: Ի վերջո մենք Մերձավոր Արևելյան կամ Հարավամերիկյան պետություն չենք, մենք քաղաքակիրթ պետություն ենք՝ անկախ նրանից թե ով է մեր երկրի ղեկավարը: Մենք ծանր օրեր անցկացրել ենք Լևոն Տեր-Պետրոսյանի ժամանակներում, բայց ռազմական հեղաշրջողի պիտակ չի կպել ու չեմ ուզում կպչի մեր երկրին»:

Ալվարդ Պետրոսյանը համոզված է, որ մեր ապավենն այսօր բացառապես մեր ժողովուրդն է. «Մեր ժողովուրդը, մեր բանակն ու մեր միտքն են այսօր մեր ապավենը: Մեր միտքն ու սիրտը միասին են բաբախում: Ի վերջո 100 տարուց մի քիչ ավել անցել է և ամենախելացի բանն այն էր, որ պետք է ունենանք Խրիմյան Հայրիկի երազած «Երկաթե շերեփը»: Ուրախ եմ, որ մենք անցած 30 տարում կարողացանք ունենալ այդ շերեփը, որը գուցե շատ մեծ չէ, ինչպես Ռուսաստանինը, ԱՄՆ-ինը, բայց այս տարածաշրջանում, պարզվեց, ամենալավ շերեփն է: Սպասում եմ՝ այս պատերազմն ավարտվի, իսկ հետո ամեն ինչի համար պատասխան են տալու»:

Անի Սահակյան