Էժան «տրյուկ» Ալիևի՞ց, թե՞ հայ-իրանական նոր խնդիր... Սպասենք ԱՄՆ-ի ու Իսրայելի հակաքայլին

Իրանի իսլամական հեղափոխության պահապանների կորպուսը (ԻՀՊԿ) զորքեր ու ռազմական տեխնիկա է տեղակայում Լեռնային Ղարաբաղի Հանրապետության հետ սահմանին գտնվող Ջոլֆա և Խոդաֆարին բնակավայրերի տարածքում, հայտնում էր «Ռուսական գարուն»-ը երեկ:

Իրանը Հայաստանի և Ադրբեջանի հետ սահմանակից շրջաններում զորավարժություններ է անցկացրել, հայտնում էր Sputnik-ը: Զորավարժություններում ներգրավվել են հետևակի, հրետանու ստորաբաժանումներ, ինչպես նաև անօդաչու թռչող սարքեր։ Իրանի ցամաքային զորքերը զորավարժություններ են անցկացրել երկրի հյուսիս–արևմտյան շրջաններում, գրում է parstoday.com–ը՝ նկատելով, որ ՆԱՏՕ-ն արցախյան պատերազմով թակում է Իրանի դարպասները:

Նշվում է, որ «Վելայաթի սիրահարները-99» իրանական բանակի մեկօրյա զորավարժություններն անցկացվեցին ազգային հզորությունն ու մարտական պատրաստությունը ցուցադրելու, ինչպես նաև երկրի հյուսիս–արևմուտքում օպերատիվ շարժունակությունը բարձրացնելու նպատակով։

Տակտիկական զորավարժությունների ընթացքում Իրանի բանակի հետևակային, ինժեներական, անօդաչու և հրետանային ստորաբաժանումները աջակցում էին մոբիլ գրոհային բրիգադին՝ առաջադրված խնդիրը գիշերային և ցերեկային ժամերին լուծելու համար։ Զինվորականները չեն նշում, թե որ երկրների սահմաններին են անցկացվել զորավարժությունները։ Ինչպես հայտնի է, Իրանը հյուսիս–արևմուտքում սահմանակից է այդ թվում Թուրքիայի, Հայաստանի և Ադրբեջանի հետ, նշում է ՌԻԱ Նովոստին։

Իրանի ԶՈւ–ն չի հայտնում՝ արդյոք զորավարժությունների անցկացումը կապված է արցախյան հակամարտության գոտում լարվածության աճի և բախումների հետ, բայց պարզ է, որ Արցախում լայնածավալ պատերազմը չի կարող անհանգստացնել հարևան Իրանին:

Ինչպես հայտնում է armlur-ը՝ հղում կատարելով Azariha-ին, Իրանը հրահանգել է անհապաղ արձագանքել սահմանին տեղի ունեցող դեպքերին: Իրանի զինված ուժերի Գլխավոր շտաբը հանձնարարական է տվել, որով սահմանին խախտումների դեպքում պետք է անհապաղ արձագանք լինի: Կայքը հայտնում է, որ Իրանի Գլխավոր Շտաբի պետը հրահանգել է, թե իբր, Իրանի տարածք ներխուժման պարագայում ավիացիան պետք է անհապաղ աշխատի: Նաև ընդգծվել է, որ իրանական ուժերը տեղակայված են սահմանին:

Առայժմ պաշտոնական հաստատումներ չկան այս տեղեկատվության հետ կապված: Սակայն հայտնի է, որ Իրանը մի քանի անգամ զգուշացրեց, որ չի հանդուրժի իր տարածքում հրթիռների վայր ընկնելը:

Այս ֆոնին երեկ, կարելի է ասել, սկանդալային հայտարարություն է արել Ադրբեջանի նախագահ Իլհամ Ալիևը: Նա ասել է, թե իբր Ադրբեջանը զենք է գնում Իրանից։
Հայտնի է, որ ԱՄՆ-ի կողմից Իրանի նկատմամբ զենքի առք ու վաճառքի պատժամիջոցները չեն հանվել և ցանկացած պետության նկատմամբ կկիրառվի պատժամիջոց, որը զենք կգնի կամ կվաճառի այդ երկրին։

Եթե Ալիևի հայտարարությունում ասվածն իրականություն է՝ նման գործարք իսկապես կայացել է՝ ապա ԱՄՆ-ն ու Իսրայելը չեն ուշացնի Ադրբեջանի նախագահի նկատմամբ հակաքայլերը: Իսկ եթե դա Ալիևի կողմից էժան «տրյուկ» է՝ հայ-իրանական հարաբերություններում սեպ խրելու, ուրեմն՝ անելիքներն արդեն պետք է Հայաստանի և Իրանի իշխանություններին է:

Մետաքսյա Շալունց