Ինչպես կպատժի իշխանությունը իր պատգամավորին

Այն, որ Իմ Քայլի պատգամավոր Քրիստինե Պողոսյանը պետք է իր պատիժը ստանա պատերազմական այս օրերին դրսեւորած պահվածքի համար, դրանում կասկած չկա: Առնվազն մանդատից զրկվելու տեսքով, որը թեեւ կարծում ենք, որ սույն անհայտ ծագման պատգամավորուհու համար ամենադաժան պատիժն է լինելու, քանզի հենց այդ մանդատի շնորհիվ է, որ ինքն ու իր նմանները կարողանում են ափեռ-ցփեռ բերանները բացել: Պատերազմի օրերին խառնակչությամբ ու քայքայիչ գործողությամբ զբաղվել, որը հավասար է նաեւ պետական դավաճանությա ն:
Սեպտեմբերի 27-ից Հայաստանում ռազմական դրություն է հայտարարվել, որի կարեւոր կետերից մեկն էլ խոսքի ազատության սահմանափակմանը վերաբերող դրույթն է: Ըստ այդմ՝ արգելվում է հայտարարություններ, ելույթներ եւ հրապարակումներ ունենալ, որոնք ի թիվս այլ բաների, պառակտիչ, քայքայիչ նշանակություն կունենան, կխաթարեն ազգի միասնականությունն ու համախմբվածությունը եւ մեզ կզրկի հաղթանակից: Քանզի հաղթանակի գրավականը հենց միասնականոթյան մեջ է: Առաջին իսկ օրվանից գրեթե բոլորը՝ լրատվամիջոցներն ու ընդդիմությունը, ընդունեցին խաղի այդ կանոնները: Որքան էլ հատկապես ծանր էր լրատվամիջոցների աշխատանքը՝ հաղորդել միայն պաշտոնական տեղեկատվություն, ոչ մի վերլուծություն, ոչ մի կարծիք, նույնիսկ փաստերի համադրում, քանզի ըստ այդ սահմանափակումների՝ անքննելի են պաշտոնյաների հայտարարությունները:
Սակայն առաջին իսկ օրվանից իշխանականների ու իշխանականների մի խմբակ պարբերաբար հանդես են գալիս ցինիկ ելույթներով եւ գրառումներով, ոմանք դավաճաններ են հայտնաբերում, մյուսները հիշում նախկիններին ու նրանց թողած վատ ժառանգությունը, երրորդներն էլ համեմատականներ տանում ապրիլյան պատերազմի հետ եւ այսպես շարունակ, բայց կա մեկը, ով բացահայտ սպառնում է՝ տողատակերում ասում, որ պատերազմից հետո ոչնչացնելու են քաղաքական օպոնենտներին: Եւ այդ մեկը Քրիստինե Պողոսյանն է, ով առաջին անգամ մոտ տասն օր առաջ բախվելուվ Հինգերորդ ալիքի լրագրողի հետ սպառնաց հարցերը լուծել պատերազմից հետո, իսկ հիմա նա մատ է թափ տալիս , հասկանալի է՝ ում գլխին.<<Ոչ մի քաղաքական գրառում չեմ արել այս 20 օրվա ընթացքում և չեմ անելու, #Հաղթելուենք , դուք միայն սպասեք դրանից հետո ձեր վիճակին, սուս սպասեք տականքներ>> գրել է այս պատգամավորուհին:
Հասկանալ է, որ սա այս պատգամավորի անձնական տեսակետը չէ, դժվար թե իր նմանները անձնական տեսակետ ունենան, նա ընդամենը արտացոլել է իր թիմում առկա տրամադրությունները: Փաստորեն մինչ ոմանք անկախ քաղաքական տարաձայնությունների առաջնագծում կենաց –մահու կռիվ են տալիս հանուն հայրենիքի, սա զբաղված է պառակտիչ գործունեությամբ: Հիմա եկեք ծուռը նստենք, ճիշտը խոսենք, եթե իշխանությունը բացահայտ ասում է՝ դուք պատերազմից հետո ձեր հալը կտենաք, որ մի քաղաքական հակակորդը ռիսկ կանի իր մասնակցությունը ցուցաբերել այս պատերազմին, թեկուզ խորհուրդներ տալու տեսքով՝ իմանալով, որ վաղը կարող է իր օգնությունը քաղաքական հայաքցների պատճառով իր դեմ շրջվել, անշուշտ՝ քչերը:

Անի Սահակյան