«Իրանը ողջունում է ԼՂ-ում ռազմական գործողությունների դադարեցումը՝ դա դիտարկելով որպես խաղաղությանն ուղղված քայլ». Իրանի ԱԳ նախարար

Իրանի արտգործնախարար Մուհամադ Ջավադ Զարիֆը ողջունել է Լեռնային Ղարաբաղի հակամարտության գոտում ռազմական գործողությունների դադարեցման և խաղաղության հաստատման համար ներդրված բոլոր ջանքերը, գրում է tasnimnews.com կայքը:

«Իրանը ողջունում է Լեռնային Ղարաբաղում ռազմական գործողությունների դադարեցումը՝ այն դիտարկելով որպես խաղաղությանն ուղղված քայլ»,- թվիթերյան իր էջում գրել է Զարիֆը:

Պաշտոնյան Հայաստանին և Ադրբեջանին հորդորել է բովանդակային երկխոսություն վարել, ինչպես նաև բարձր է գնահատել կրակի դադարեցման ուղղությամբ ռուս հարևանների ներդրած կառուցողական ջանքերը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից մարդասիրական նպատակներով հայտարարվել էր կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար`Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։