Խելք ունեցեք ու լռեք

Պատերազմը դեռ չի ավարտվել, բայց իշխանությունները քաղաքական հաշիվները մաքելով ու մեղավորների փնտրտուքով են զբաղված: Պատերազմն, անշուշտ, կավարտվի ու կխոսենք, թե ինչպես այն սկսվեց, ով , ինչպես ու ինչու հասցրեց այս վիճակին, դիվանագիտական ֆրոնտում ինչպես մենք պարտվեցինք, որ գործի անցան թնդանոթները: Սակայն իշխանականները ըստ էության այս հարցադրումներին պատասխան տալու սարսափից, պատերազմը դեռ չավարտված, անցել են հակահարձակման, դավաճաններ ու մեղավորներ են փնտրում, փորձում նսեմացնել իրական հերոսներին, զբաղվում նույն խառնակչությամբ, ինչ ապրիլյան պատերազմի դեպքում:

ԱԺ պաշտպանության եւ անվտանգության մշտական հանձնաժողովի նախագահ, ապրիլյան պատերազմի հանգամանքները քննող հանձնաժողովի ղեկավար Անդրանիկ Քոչարյանը դրանցից մեկն է, ով այս օրերին պղտոր ջրում ձուկ որսալով է զբաղված: Նա հավանաբար հասկացել է, որ պատասխան տվողներից մեկն էլ ինքն է լինելու, քանզի այս օրերին մեծ-մեծ փռթողների շարքում ինքն առաջատար դիրքեր է զբաղեցնում, եւ կրկին ասպարեզ է նետվել: Իհարկե խելք ունենար, գոնե այս օրերի կլռեր, բայց ընտրությունն իրենն է: Ուրեմն, սույն պարոնին հանգիստ չի տալիս Ռոբերտ Քոչարյանի եւ նրա ընտանիքի հայրենասիրությունը, այն, որ ի հեճուկս իր հանդեպ իշխանությունն երի հակամարդկային վերաբերմունքի, պատերազմի առաջին իսկ օրվանց թե նյութապես, թե բարոյապես կանգնած են ժողովրդի, արցախցու կողքին: Էլ չհիշեցնենք, որ Արցախի պետության ու խաղաղության կերտողը հենց Ռոբերտ Քոչարյանն էր, ում հայաստանյան նախագահության ժամանակ էլ գրեթե անսասան մնաց մեր խաղաղությունը:
Բայց իշխանական պատգամավորը նորից ճամարտակել է, թե Ռոբերտ Քոչարյանը ճիշտ կաներ փիառ նպատակով Արցախ մեկնելու փոխարեն իր միլիոնները փոխանցեր հանգանակման ֆոնդին .«Քոչարյանը եթե մի կոպեկ տված լիներ՝ հիմա քթներիցս բերել էր» մարտնչող ինքնավստահությունն այս հարցում էլ է ցուցադրել նա ու հիշեցրել, որ երկրորդ նախագահի ազատության համար 4 միլիարդ գրավի մասին . «Եթե այդպիսի ռեսուրսի տիրապետող մարդիկ կան, նրանք ամեն ինչ պետք է դնեն մեր երկրի հաղթանակի կերտման գործին: Սկսած իրենց դղյակներից՝ մեր ամբողջ ռեսուրսը պետք է լիներ մեր պետության անվտանգության հիմքերի ամրապնդման ուղղությամբ ծախսված»: Իհարկե, Անդրանիկ Քոչարյանը դժվար կարողանա ընկալել, նրա համար, անշուշտ, բարդ է ընդունել, թե ինչ է տվել Ռոբերտ Քոչարյանը հանուն Արցախի եւ Հայաստանի անկախության եւ անվտանգության ամրապնդման համար, ու շարունակում է նույնը անել հիմա, եւ Անդրանիկ Քոչարյանը չէ այն մարդը, ով պետք է իրավունք վերապահի իրեն նման հարցապահանջ ներկայացնելու: Լավ կլինի ձեր ու ձեր իշխանության մասին մտածեք, թե ինչպես, ինչ արեցիք, որ Արցախը հայտնվեց այս վիճակում:

Անի Սահակյան