Օբաման բացառում է
ԱՄՆ նախագահ Բարաք Օբաման հայտարարել է, որ չի մրցի Ռուսաստանի նախագահ Վլադիմիր Պուտինի հետ Սիրիայում։ Այս մասին հայտնում է Politico պարբերականը։ Կալիֆոռնիայում ԱՄՆ-ԱՍԵԱՆ (Հարավարևելյան Ասիայի պետությունների ասոցիացիա) գագաթնաժողովում իր ելույթի ընթացքում նա ռուսական բանակն անվանել է «հզորությամբ երկրորդն աշխարհում»։ «Հարցն այն է, թե ինչպես մենք կարող ենք վերջ տալ տառապանքներին և տարածաշրջանի անկայունությանը, զանգվածային միգրացիային, բռնությանը, դպրոցների, հիվանդանոցների և քաղաքացիական անձանց ռմբակոծություններին, դադարել ստեղծել անվտանգ թաքստոցներ ահաբեկիչների համար»,- ասել է նա։ Օբաման նշել է, որ սիրիական ճգնաժամի կարգավորումը կօգնի ավելի արդյունավետորեն համակարգվել ոչ միայն Ռուսաստանի, այլև տարածաշրջանում այլ երկրների հետ՝ ԴԱԻՇ-ի դեմ պայքարում։ ԱՄՆ նախագահը նաև ընդգծել է, որ սիրիական ընդդիմությունը չի կարող դիմակայել ռուսական խոշոր բանակին։ «Սակայն դա չի լուծի Սիրիայի կայունացման խնդիրը, դրան հասնելու միակ միջոցը որևէ տեսքով քաղաքական փոխակերպում ապահովելն է»,- հավելել է Օբաման։ Նրա խոսքով՝ Մոսկվան պետք է մտածի այն մասին, որ սիրիական ճգնաժամի ավարտին որպես դաշնակից կստանա «լիովին ավերված երկիր»։
Հետևեք մեզ Viber-ում
