Արագած Ախոյանն առաջնագծից. ի՞նչ վիճակ է տիրում սահմանին

Քաղաքական գործիչ Արագած Ախոյանը, «ԿԱՄՔ» նախաձեռնության մի խումբ անդամներ, ինչպես նաև «Սև Հովազ» կամավորական ջոկատը՝ Ռուստամ Գասպարյանի գլխավորությամբ գտնվում են Արցախում, մեր զինվորների կողքին պաշտպանում են հայրենիքը:

hayeli.am-ը զրուցել է Արագած Ախոյանի հետ.

Պարոն Ախոյան, ինչպե՞ս եք, ի՞նչ վիճակ է Արցախում, մասնավորապես՝ սահմանին:

- Չեմ կարող ասել՝ կոնկրետ որ մասում ենք գտնվում, բայց կարող եմ ասել, որ առաժմ հարաբերական անդորր է՝ ի տարբերություն առաջին օրերի: Ուզում եմ մի բան էլ շեշտել՝ Ռուստամ Գասպարյանի գլխավորությամբ պահպանում ենք բոլոր կանոնները, բոլորիս ոգին բարձր է, սպասում ենք հրամանների:

Ի՞նչպես են տրամադրված զինվորները, մանավանդ՝ երբ տեսան Դուք ևս միանում եք իրենց:

- Մենք զգում ենք՝ մեր ազգի ոգին ինչ բարձր է, մեր թիկունքն ամուր է: Բոլորի շունչը զգում ենք: Ունենք հպարտանալու զինվորներ, մեր ընկերների շարքում էլ կան տղաներ, ովքեր, ցավոք սրտի, նահատակվեցին: Ուզում եմ նշել, որ աշխարհի տարբեր ծայրերից մեր հայրենակիցները զանգահարում են Ռուստամ Գասպարյանին և պատրաստակամություն հայտում գալ ու պաշտպանել մեր հայրենիքը: Մարդիկ կան, որոնք մինչև անգամ ճանապարհ են գտել ու վերադարձել:

Արագած Ախոյանը մեկ անգամ ևս ընդգծեց, որ մենք թշնամուն խաղաղություն ենք պարտադրելու, որովհետև մեր երկիրը խաղալիք չէ:

Անի Սահակյան