Հերթական սպառնալիք. Թուրքիան չափերն անցավ

Նիկոլ Փաշինյանը Միավորված ազգերի կազմակերպության 75-րդ տարեդարձին հանդես է եկել ելույթով, որի տեսանյութն, ինչպես մյուս երկրների առաջնորդներինը, հրապարակվել է ՄԱԿ-ի պաշտոնական կայքում և յութուբյան ալիքում:

Նա, մասնավորապես նշել է, որ ՄԱԿ-ն ապացուցեց իր կենսունակությունը` երկու թվացյալ անհամատեղելի հասկացությունները փոխակերպելով ինքնիշխան պետությունների արդյունավետ գլոբալ համակարգի` միավորելով դրանք ընդհանուր արժեքներով և սկզբունքներով, կիսելով ապագայի ընդհանուր տեսլականը և ունենալով համագործակցության ընդհանուր ինստիտուտներ կառուցելու վճռականություն:

«Արդյունավետորեն իրականացնելով ժողովուրդների ինքնորոշման սկզբունքը՝ ՄԱԿ-ը ծննդյան վկայականներ է տվել կամ օգնել է վերականգնել ավելի քան 100 ազգերի ինքնիշխանությունը: Շատ ժողովուրդներ, ինչպես երբեք մարդկության պատմության մեջ, հնարավորություն ստացան իրենց մասնակցությունը բերել համաշխարհային գործերին և իրացնել իրենց զարգացման ներուժը՝ ընթանալով բարգավաճման ուղով»:

Փաշինյանը, կարծես, ականջալուր եղավ ընդդիմադիրների քննադատություններին, որ չի խոսում Արցախի ինքնորոշման իրավունքի մասին, բարձր ամբիոնից հիշատակում է ինքնորոշման իրավունքի մասին:

Բայց սա արձանագրելուց բացի՝ հարց է առաջ գալիս:

Ինչու՞ է Փաշինյանը երկու տարի բանակցային գործընթացը, որը անվանում էր «իր կետից» ընթացող, հիմա վերադառնում, այսպես ասած՝ նախկիններին դիրքորոշմանը:
Եթե պետք է 2 տարի հետո հիշեր ինքնորոշման իրավունքի մասին՝ պարզ չէ՞, որ հակառակորդի համար այդ 2 տարիները ավելի թեթև էին՝ բանակցություններում ուժի դիրքերից հանդես գալու առումով:

Հիմա ի՞նչ ունենք...

Բանակցային գործընթաց, որում Ադրբեջանի հետ ուս-ուսի տված մեկ խաղացող էլ է ավելացել՝ Թուրքիան, որը ընդդեմ Հայաստանի հստակ քաղաքականություն է տանում և պաշտոնապես հայտարարել է, որ ղարաբաղյան հակամարտության կողմ է:
Թուրքիայի նախագահ Ռեջեփ Թայիփ Էրդողանը Հայաստանին հերթական անգամ մեղադրել է Հարավային Կովկասում խաղաղության հաստատման գլխավոր խոչընդոտ լինելու մեջ։ «Հուլիսին Ադրբեջանի տարածքի վրա հարձակում գործած Հայաստանը ևս մեկ անգամ ապացուցեց, որ Հարավային Կովկասում կայուն խաղաղության և կայունության ամենամեծ խոչընդոտն է»,- նշել է Էրդողանը ՄԱԿ Գլխավոր ասամբլեայի 75-րդ նստաշրջանում ունեցած ելույթի ժամանակ։

Թուրքիայի նախագահն ասել է, որ իրենք տարածաշրջանում ԵԱՀԿ-ի և ՄԱԿ-ի որոշումների հիման վրա Վրաստանի ու Ադրբեջանի տարածքային ամբողջականության պահպանմամբ հակամարտությունների, այդ թվում՝ Լեռնային Ղարաբաղի կարգավորման կողմնակից են։

Հերթական անգամ հանդես է եկել նաև Թուրքիայի պաշտպանության նախարարը: Այս անգամ հայ-ադրբեջանական սահմանի տավուշյան հատվածում, ըստ ադրբեջանական գործակալությունների հաղորդագրության՝ «հայկական գնդակից սպանված» ադրբեջանցի զինծառայողի՝ Էլշեն Մեմմեդովի թեմային։

Այդ մասին, ըստ Ermenihaber.am-ի՝ գրառում է արվել Թուրքիայի ՊՆ-ի Twitter-ի պաշտոնական էջում։ Թուրքական ռազմական գերատեսչությունը Հայաստանին մեղադրել է «հրադադարի ռեժիմի խախտման մեջ» և զգուշացրել, որ Հայաստանը իսկույն «դադարեցնի կրակի հետ խաղալը»։

Թուրք-ադրբեջանական քարոզչական շեշտերը կրող նշյալ հայտարարությունը երկրորդել է նաև Թուրքիայի արտգործնախարար Մևլութ Չավուշօղլուն։ Ըստ նրա ձևակերպումների՝ Հայաստանը պիտի դադարեցնի «ագրեսիան և խելքը գլուխը հավաքի»։ Չավուշօղլուն մեկ անգամ ևս շեշտել է, որ Թուրքիան շարունակելու է լինել եղբայրական Ադրբեջանի կողքին։

Հիմա հայկական կողմի համար լուրջ խնդիր կա՝ դիմակայել թուրք-ադրբեջանական հարձակմանը՝ դիվանագիտական ճակատում, մյուս կողմից էլ չեզոքացնել նրանց՝ պատերազմ հրահրելու նպատակը:

Մետաքսյա Շալունց