Նիկոլ Փաշինյանը Գագիկ Ծառուկյանին ընտրության հնարավորություն չի թողել
Գագիկ Ծառուկյանը արտակարգ իրավիճակի ավարտից անմիջապես հետո Երևանի վարչական շրջաններում և մարզերում ընտրողների հետ հանդիպումների շարք է սկսել։
Այնպիսի տպավորություն է, թե հանրապետությունում քարոզարշավ է ընթանում, Ծառուկյանն էլ նախընտրական ոճով ելույթներ է ունենում։ Ելույթները, որոնք համաճարակային շրջանի համար բավական բազմամարդ են, նույն հռետորաբանության շրջանակում են ընթանում։ ԲՀԿ առաջնորդն ամենուր անընդհատ շեշտում է, որ Նիկոլ Փաշինյանի իշխանությունը սոցիալ-տնտեսական խնդիրների լուծման ուղղությամբ բավարար քայլեր չի կատարել, խոստացված տնտեսական հեղափոխությունն ամբողջությամբ ձախողված է, իսկ կառավարությունն ու վարչապետը չունեն բավարար կարողություն՝ լուծելու պետության և հանրության առջև կուտակված խնդիրները։ Այդ պատճառով այս իշխանությունը պետք է 100 տոկոսով հեռանա։ Ծառուկյանը նաև շեշտում է, թե իրեն որևէ պաշտոն պետք չէ, ինքն ամեն ինչ ունի, պարզապես մտածում է ժողովրդի մասին։
Նման հռետորաբանությամբ ելույթներ ԲՀԿ առաջնորդը ունեցել է նաև նախկինում, երբ խստորեն քննադատում էր նախկին իշխանությունների վարած տնտեսական քաղաքականությունը։ Չնայած սուր քննադատություններին՝ Ծառուկյանն այն ժամանակ մինչև վերջ չգնաց։ Ամեն անգամ, երբ հարցը հասնում էր վերջնագծին, ու գալիս էր քաղաքականության և սեփական կապիտալի միջև ընտրություն կատարելու պահը, Ծառուկյանը միշտ ընտրում էր սեփական կարողությունը պահելու տարբերակը։ Դա անշուշտ նրա իրավունքն էր, որը որպես լուծում ընդունել կամ չընդունելը անհատական մոտեցման հարց է։ Համենայն դեպս, Ծառուկյանին դատելը ճիշտ չէ, քանի դեռ դատելու հավակնություն ունեցողները ԲՀԿ առաջնորդի կարողության կոսրստի հրամայականի առջև կանգնած չեն եղել, այն պարզ պատճառով, որ չեն ունեցել նման կարողություն։
Ինչևէ, հիմա, սակայն, հեղափոխական ժամանակներ են, և Նիկոլ Փաշինյանի իշխանությունը, ի տարբերություն նախկինների, Ծառուկյանի համար ընտրության հնարավորություն չի թողել։ Իշխանությունները շատ բաց տեքստով հայտարարել են, որ կապիտալի վերաբաշխման գործընթաց են սկսելու։ Ապօրինի գույքի բռնագանձման մասին օրենքը դամոկլյան սրի նման կախված է Ծառուկյանի և նրա դասակարգի գլխին, ուստի Ծառուկյանը ստիպված է դառնալ հեղափոխական։ Այսպես թե այնպես՝ նրա կարողության անվտանգությունը վտանգված է՝ անկախ նրանից՝ նա Նիկոլ Փաշինյանի իշխանության դեմ կոշտ քաղաքական պայքար կմղի, թե ոչ։
Գագիկ Ծառուկյանը դեռ չի հայտարարել, որ պահանջում է Փաշինյանի հրաժարականը, բայց ինչ-որ պահից սկսած նա թերևս կսկսի Նիկոլին մերժելու գործընթացը։ Նիկոլ Փաշինյանը ինքն է ստիպել Ծառուկյանին գնալ այդ քայլին։
Հայկ Դավթյան
Հետևեք մեզ Viber-ում
