Կարգին Հայկոյի երկու տարին․ Երևանի ձախողված տարիները

Մամուլում տեղեկություններ են հրապարակվել, թե առաջիկայում Երևանի քաղաքապետ Հայկ Մարությանը հրաժարական է ներկայացնելու՝ առողջական խնդիրների պատճառաբանությամբ։

Կա նաև տեղեկություն, թե նա նախկինում արդեն իսկ հրաժարականի փորձ արել է, սակայն վարչապետ Նիկոլ Փաշինյանը չի ընդունել հրաժարականը։ Ամեն դեպքում, Հայկ Մարությանը ավագանու վերջին նիստը չի վարել։ Նիստում նշվել է, թե աշխատանքի չներկայանալու պատճառը նրա վատառողջ լինելն է։ Սեպտեմբերի 23-ին կլրանա ուղիղ երկու տարին, երբ Հայկ Մարությանը Նիկոլ Փաշինյանի անմիջական կոչով և հորդորով ընտրվեց Երևանի քաղաքապետ։ Հենց Հայկ Մարությանի քարոզարշավի ժամանակ էր, երբ Նիկոլ Փաշինյանն առաջ քաշեց հասարակությանը սևերի և սպիտակների բաժանելու տխրահռչակ գաղափարը։ Ինչևէ, սևերի ու սպիտակների պատմությունն արդեն անցյալում է, եկել է գործերի մասին խոսելու և սպիտակ լինելու մասին փաստեր ներկայացնելու ժամանակը։
Իսկ փաստերը ոչ մի լավ բանի մասին չեն վկայում։ Երկու տարվա ընթացքում Երևանում որևէ արժանահիշատակ գլոբալ նախագիծ չի դեռևս չի մեկնարկել։ Այդպես էլ չսկսվեց Աջափնյակի մետորյի կայարանի շինարարությունը, որը նրա նախընտրական խոստումներից մեկն էր։ Մետրոյի նոր կայարանի մասին քաղաքապետը խոսեց ընտրվելուց կարճ ժամանակ անց, ԶԼՄ-ներում հրապարակվեցին նոր կայարանի էսքիզները, նշվեց, որ մետրոյի նոր կայարանների 1 կմ կառուցման գինը տատանվում է 50-100 մլն դոլարի սահմաններում, և չնայած գումարի մեծ չափին` հայտարարվեց, թե ներդրումային ծրագիրն արդեն գործնական փուլ է մտել: Արդեն անցել է բավական ժամանակ, փաստացի մետրոյի նոր կայարանը, որը պետք է կանգառ ունենար Թումոյի այգու մոտ, դեռևս գտնվում է թղթի վրա։
Հայկ Մարությանի քաղաքապետ դառնալուց անմիջապես հետո Երևանում կտրուկ վատացավ աղբահանության և տրանսպորտի վիճակը։ Մի պահ Երևանին անգամ աղբային հակահեղափոխություն էր սպառնում, քանի որ սպիտակ քաղաքապետը չէր կարողանում նոր աղբահանություն կազմակերպել, աղբը օրերով կուտակվում էր բակերում, աղբամաններ ու աղբատարներ չկային։ Ի վերջո Հայկ Մարությունյանին օգնության հասան նախկին իշխանություններին սերտաճած, Սերժ Սարգսյանի հովանու տակ բարգավաճած օլիգարխները։ Ինչպես հայտնի է, Սամվել Ալեքսանյանը աղբատար մեքենաներ նվիրեց Երևանի քաղաքապետարանին, ինչի արդյունքում աղբային կոլապսը հաղթահարվեց։ Նույնը սակայն տրանսպորտի մասին ասել չի կարելի։ Հայկ Մարությանի նախընտրական ծրագրի կարևոր կետերից մեկը վերաբերում էր տրանսպորտի խնդրին:
Մարությանը նախընտրական քարոզարշավի ընթացքում օրինակ էր բերում եվրոպական քաղաքների տրանսպորտային համակարգերը և դրանց զարգացածությունը համեմատում իշխանությունների՝ իրենց քաղաքացիների նկատմամբ վերաբերմունքի հետ: Հայտարարում էր, թե ամոթալի է համարում Երևանի քաղաքացիների «կռացած գործի գնալն ու գալը»: Արդեն երկու տարի է, ինչ Հայկ Մարությանը, նույն ինքը՝ կարգին Հայկոն Երևանի քաղաքապետն է, իսկ երևանցիները շարունակում են «կռացած գործի գնալ և գալ»: Տրանսպորտի հարցի լուծման և բարելավման ուղղությամբ որևէ կոնկրետ քայլ արված չէ։ Ճանապարհաշինական ծրագրերը նույնպես Երևանում կանգնած են։
Կանաչ տարածքների ավելացման և ոռոգման ցանցի ընդլայնման, վերելակների նորոգման և քաղաքային տնտեսության բազմաթիվ հարցերի լուծման ուղղությամբ ևս Հայկ Մարությունը կատարել է զրո քայլ։
Նրա նախընտրական մյուս խոստումը, թե Երևանում ներդրվելու է նոր ինստիտուտ և համայնքային կարևոր խնդիրների լուծման տարբերակները պետք է դրվեն հանրաքվեի, նույնպես մնացել են թղթի վրա։ Միակ բանը, որ Հայկ Մարությանի գործունեությունից կարելի է հիշել, դա հրապարակում դրված թանկարժեք տոնածառն էր։ Նրա շնորհիվ 2020 թվականի Ամանորը դիմավորեցինք 71 մլն դրամ արժողությամբ շքեղ տոնածառով։ Իհարկե, այնպես չէ, որ մեզ միայն տոնածառն էր պակասում։ Բայց մենք ունենք այն, ինչ որ ունենք։

 Հայկ  Դավթյան