Նիկոլ Փաշինյանից ազատվել են ուզում նաեւ յուրայինները

Քաղաքացիական ակտիվիստ Ջիվան Աբրահամյանը, ով հայտի է որպես գործող իշխանությունների ակտիվ կողմնակից, այսպես կոչված , հեղափոխության պահապանների գնդի կարկառուն ներկայացուցիչ, իր ֆեյսբուքյան էջում անդրադարձել է վարչապետ Նիկոլ Փաշինյանի վերջին հայտարարություններին՝ նշելով , որ, եթե պետք լինի ժողովուրդը նոր հեղափոխություն կանի և այս անգամ կհեռացնի արդեն Նիկոլ Փաշինյանին: Երիտասարդը դժգոհություն է հայտնել, մասնավորապես, Փաշինյանի վերջին հայտարարության վերաբերյալ՝ «Մի շիշ քիչ արաղ խմեք, երկու «պաշկա պաբիրոս» քիչ ծխեք », Ջիվանի դուրը չէր եկել այն, որ Փաշինյանը և իր շրջապատը մեծ-մեծ պարգևավճարներ են ստանում:
«Ավելի լավ է արաղ չխմելու կոչերի փոխարեն պարգեւավճար չստանաք, մի հատ քիչ քֆուր ուտեք, դրա փոխարեն գործ անեք, ասֆալտը սարքեք» ասում է նա ու սպառնում Նիկոլ Փաշինյանին․«Եթե պետք լինի էլի հեղափոխություն կանենք, էդ ենթադրել եք, որ դուք Ազատիչն եք, եկել մեզ ազատե՞լ եք։ Մի հատ Ազատիչ ռադ ենք արել, ձեզ էլ ռադ կանենք։ Մենք ոչ վանդալներ ենք, ոչ էլ արաղ լակող հասարակություն, պետք եղավ նորից հեղափոխություն կանենք» տեսանյութում ասում է նա։ Այս երիտասարդի եւ իր ընկերների «փառահեղ» գործունեության մասին արդեն գիտեն բոլորը, նրանք խոստանում էին «ջարդել» Արցախի արդեն նախկին նախագահ Բակո Սահակյանի գլուխը, նրանք ՀՅԴ-ական Հրանտ Մարգարյանին թոռնիկի հետ զբոսանքի ժամանակ քաշքշեցին, նրանք հարձակվեցին «Հայելու» վրա, նրանք ամենուր սպառնում են բոլոր նրանց, ովքեր կհամարձակվեն քննադատել իշխանությանը, հատկապես, Փաշինյանին։ Իսկ նրանց «ամենալուրջ» աշխատանքն, անշուշտ ՀՀ երկրորդ նախագահ Ռոբերտ Քոչարյանի դեմ ցույցերն էին, կամ ավելի ճիշտ Մարտի 1-ի գործով դատական նիստերին դատարանի բակում ընդդեմ Քոչարյանի ցույցեր կազմակերպելը ։ Թե ինչ պատահեց , որ մեկ օրում Փաշինյանի մոլի երկրպագուն, հեղափոխության մոլի պահապանը հանկարծ որոշեց դառնալ Փաշինյանի քաղաքական ախոյանը, սպառնալ իշխանափոխությամբ, կարելի է գուշակել։
Հասկանալի է, որ նա իշխանությանը չէր աջակցում հենց այնպես, ամեն ինչ, այդ թվում այդ աջակցությունն իր գինն ուներ, քանզի դժվար է հավատալ, որ հատկապես վերջերս կարելի է աջակցել իշխանությանը։ Ամենայն հավանականությամբ երիտասարդի փողը ուշացրել են, կամ որոշել են, որ էլ չեն տալու, տղան էլ արդար պահանջով բողոքի ձայն է բարձրացնում։ Կարծում ենք պատահական չէ, որ Ջիվան Աբրահամյանը այդ պահանջը բարձրացրեց այն բանից հետո, երբ Մարտի 1-ի զոհերի իրավահաջորդները հայտարարեցին, որ այլեւս չեն մասնակցելու դատավարությանը, այսինքն էլ կոնտր հանրահավաքներ անելու անհրաժեշտություն չի լինելու ու երիտասարդը հավանաբար զրկվել է ապրուստի միջոցից։ Մենք բազմիցս ենք գրել, որ իսկզմանե նրանց հովանավորության եւ կուրացիայի հարցն իր վրա էր վերցրել Դոն Պիպոն, ապա Իմ Քայլի պատգամավոր Հայկ Սարգսյանը, իսկ հիմա ԱԺ փոխնախագահ Ալեն Սիմոնյանն է այդ աշխատանքները կազմակերպում։
Փաստորեն, կամ Փաշինյանն իրական աջակիցներ չունի եւ դա անում են միայն փողի դիմաց, կամ էլ ստացվում է, որ հիմա յուրայիներն են անգամ ուզում ազատվել Նիկոլի իշխանություններից:

Անի Սահակյան