«ՇՊՀ գորշ կարդինալը» փորձում է հովանավորներ ու բարեխոսներ գտնել իշխանական պատգամավորների մեջ
ՇՊՀ-ի ռեկտորի պաշտոնակատար Երվանդ Սերոբյանի դեմ հարուցված քրեական գործը դատարան ուղարկելը բուհի մի քանի աշխատակիցների` իրեն մշտապես «գորշ կարդինալ» պատկերացնող պրոռեկտորի պարտականությունները կատարող Նազելի Ավետիսյանի գլխավորությամբ հույսեր է ներշնչել, որ Երվանդ Սերոբյանը շուտով կազատվի ռեկտորի պաշտոնակատարի պաշտոնից, և կիրականանա Նազելի Ավետիսյանի վաղեմի բաղձանքը` ինքը կդառնա ռեկտորի պաշտոնակատար ու հետո էլ ռեկտոր:
Այս նպատակի իրականացման համար նա փորձում է հովանավորներ ու բարեխոսներ գտնել իշխանական պատգամավորների մեջ` չհասկանալով, որ բուհում նա, բացի իր ընկերուհիներ Օֆելյա Հովհաննիսյանից ու Մանուշակ Կարապետյանից, որևէ այլ հենարան չունի և ընդունված էլ չէ: Ընդ որում` վերջին երկուսը ևս թաքուն երազանքներ ունեն, որ հենց իրենցից մեկը դառնա ռեկտոր, քանի որ իրենք իրար հետ ավելի մտերիմ են: Այն, որ դեկան Օֆելյա Հովհաննիսյանը 2019 թվականի ռեկտորի երկու ընտրությունների տապալման մեջ իր մասնակցությունն ունի հոգաբարձուների խորհրդում ընդգրկված իր կողմից վերահսկվող մի քանի ուսանողների շնորհիվ` դա բոլորը գիտեն բուհում: Այդ ամենը, ըստ բուհի քաջատեղյակ աղբյուրների, Օֆելյա Հովհաննիսյանը կատարեց ՀՀԿ-ական նախկին ռեկտոր Սահակ Մինասյանի ցուցումներով, քանի որ Սահակ Մինասյանն էր օրենքի խախտումներով Օֆելյա Հովհաննիսյանին 2018 թվականի փետրվարին դեկան դարձրել: Ինչ վերաբերում է Մանուշակ Կարապետյանին, ապա սա այս դավադիր խմբի ամենաթույլ օղակն է և միամիտներին կարող է համոզել, որ իրեն վերևներից լրջորեն սատարում են. նույն կերպ լուրեր էր տարածում, որ անցած տարվա ռեկտորի ընտրությանն իրեն հովանավորում էր Դավիթ Սանասարյանը: Ամեն դեպքում բուհում լավ գիտեն, որ Նազելի Ավետիսյանի և իր թիմի հետագա գործունեության դեպքում նրանք կկանգնեն լրջագույն խնդիրների առջև, հատկապես որ Նազելի Ավետիսյանի` որպես դասախոսի, ամբիոնի նախկին վարիչի, պրոռեկտորի պարտականությունները կատարողի գործունեությունը բոլորին է հայտնի և այդ ամենի մասին հրապարակային ասելու ու ստուգելու շատ բաներ կան...
Անի Սահակայան
Հետևեք մեզ Viber-ում
