ՏԵՍԱՆՅՈՒԹ. Ոստիկանները փորձում էին տուգանել Փաստաբանների պալատի նախագահին դիմակ չկրելու համար, բայց վերջում իրենք իրենց տուգանեցին

Փաստաբանների պալատի նախագահ Արա Զոհրաբյանն իր ֆեյսբուքյան էջում տեսանյութ է հրապարակել և գրել. «Անհրաժեշտ դեպքերում դիմակ կրելը համարել եմ կարևոր, անկախ պարետի որոշումից: Այսօր Հյուսիսային պողոտայում ինձ մոտեցան 4 ոստիկան, և արձանագրություն կազմեցին, այն պատճառաբանությամբ, որ դիմակը չէր ծածկում քիթս և բերանս:

Ընդ որում, դիմակն այդպես էի կրում, քանի որ պարետի որոշմամբ սահմանված կանոնի համաձայն անհրաժեշտ է չհպվել դիմակին օգտագործման ժամանակ, հպվելու դեպքում ձեռքերը մշակել սպիրտ պարունակող միջոցով և լվանալ օճառով: Հետևաբար, ըստ նույն կանոնի պետք է դիմակին դիպչեի միայն ախտահանման միջոց ունենալու դեպքում, քանի որ դիմակս խոսելու ընթացքում իջել էր: Չէի անդրադառնա այս միջադեպին, եթե արձանագրություն կազմող ոստիկանները տիրապետեին ՀՀ վարչական իրավախախտման վերաբերյալ օրենսգրքի (ՎԻՎՕ) ընթացակարգային կանոններին, որոնց պարտավոր էին տիրապետել: Սա մտահոգիչ եմ համարում մեծ թվով մեր քաղաքացիներին տուգանելու ֆոնին, քանի որ անիրազեկ քաղաքացին չի կարողանում իրեն պաշտպանել:

Ի խախտումն ՎԻՎՕ 225 հոդվածի չբացատրվեց իմ իրավունքները, որոնք նախատեսված են ՎԻՎՕ 267 հոդվածում: Արձանագրության համապատասխան հատվածում, որտեղ նախատեսված է իրավունքներս բացատրելու մասին իրենց գործողության նկարագրությունը, ոստիկանները գաղափար չունեին թե ինչ պետք է բացատրեն ինձ: Եվ վերջում ոտիկաններից մեկը հպվեց իր դիմակին և երբ պարզեցինք, որ նա խախտում է թույլ տվել, մյուս ոստիկանը (00993) հավաստիացրեց, որ արձանագրություն կկազմեն (այդ պահին վերջացել էին արձանագրության բլանկները): Ոստիկանը պետք է այս դեպքում իմանա ընթացակարգային օրենսդրությունը և յուրաքանչյուր անգամ արձանագրություն կազմելիս պետք է հաշվի առնի գործի բոլոր հանգամանքները և ինքը չխախտի այն, ինչի համար տուգանում է մարդկանց: Տուգանքի որոշում լինելու դեպքում այն վիճարկելու եմ»:

https://www.facebook.com/100006642580999/videos/pcb.2828981813999877/2828979274000131/?type=2&theater