Կրճատել են Բակո Սահակյանի եղբոր դստեր հաստիքը
Հրապարակ օրաթերթը գրում է.
ՀՀ կրթության, գիտության, մշակույթի եւ ապորտի նախարարության հանրակրթության վարչության պետի տեղակալ Նոնա Սահակյանն օրեր առաջ ազատվել է աշխատանքից։ Կառուցվածքային փոփոխություններ իրականացնելու փուլում նրան առաջարկել են նույն վարչությունում բաժնի պետի պաշտոն, բայց քանի որ դա ավելի ցածր պաշտոն է, նա հրաժարվել է։ Ի դեպ, Նոնա Սահակյանն Արցախի նախկին նախագահ Բակո Սահակյանի եղբոր դուստրն է։
«Հրապարակ»-ի հետ զրույցում Սահակյանը հաստատեց մեր տեղեկությունը՝ նշելով, որ վարչության պետի տեղակալի հաստիքը կրճատվել է․ «Առաջարկել են այլ պաշտոն՝ բաժնի պետի, ես չեմ համաձայնել։ Իմ պաշտոնը՝ որպես տեղակալի, ինձ ավելի հարմար էր՝ մասնագիտական աշխատանք կատարելու։ Կա վարչություն, վարչության պետեր, ես ենթականեր չունեի, ենթարկվում էի միայն վարչության պետին։
Մեզ մոտ համակարգողը մի տեղակալ էր, իսկ Ռուսաստանի Դաշնությունում վեցից ավելի տեղակալ ուներ հանրակրթության վարչության պետը։ Ես նախկինում, մինչեւ փոփոխությունները, արտաքին կապերի բլոկն էի համակարգում, աշխատում էի բաժնի պետերի հետ։ Դա օգնություն էր վարչության պետին, էս վերջին 2 տարվա ընթացքում, ինչ իրենք եկել են, այդ գործառույթն են ինձնից վերցրել, ինչ այս մարդիկ եկել են իշխանության, ես վարչության պետին չեմ փոխարինել։ Ստացվում էր, որ ես կատարում էի միայն մասնագետի աշխատանք»։
Նա նշեց, որ իրեն առաջարկել են նոր ստեղծվող բաժնի պետի պաշտոնը․ «Ինձ հրավիրել է նախարարի տեղակալը՝ Ժաննան, եւ ասել է, որ պետք է անցնես բաժնի պետի աշխատանքին, հարց եմ տվել՝ ինչի՞ հետ է կապված, եթե ավելի բարձր պաշտոն լիներ, ես կհասկանայի, բայց ինչի՞ ցածր, պատասխանել է, որ դա իրենք ցածր չեն համարում»։ Հարցին՝ Բակո Սահակյանի եղբոր դուստրը լինելու հանգամանքը կապ ունի՞ հաստիքի կրճատման եւ իր ազատվելու հետ, տվեց բացասական պատասխան․ «Չէ, ինձ, համենայնդեպս, նման բան չի ասվել։ Ես Հանրապետական կուսակցության անդամ եմ, որեւէ հարց ինձ չի տրվել։ Քաղաքականության հետ կապված խոսակցություն չի եղել։ Ես չէի ասի, ես նախարարությունում դրա հետ չեմ առնչվել։ Միգուցե մարդիկ թիմ են ստեղծում, բայց ես չեմ ասելու, որ դա կապված է նախկին իրադարձությունների հետ»։
Ի դեպ, մենք տեղեկացանք, որ Բակո Սահակյանն այժմ Արցախում չէ՝ մեկնել է Եվրոպա։ Մեզ ասացին, որ Արցախի նախկին նախագահի բացակայությունը երկրից կնոջ առողջականի հետ է կապված։
Հետևեք մեզ Viber-ում
