«Աշնանը ճտերը կհաշվենք և կտեսնենք, թե այդ գարին ի՞նչ են արել». Հրաչ Բերբերյան

«Հայաստանի Ագրարագյուղացիական միավորում» հ/կ-ի նախագահ Հրաչ Բերբերյանը լրագրողների հետ հանդիպմանը ասաց,որ Հայաստան մտած պարարտանյութն անցած տարվա համեմատ 5 անգամ պակաս է։«Դիզվառելիքը մոտ 4-5 օրից նոր կսկսեն բաժանել գյուղացուն։ Տարին կես է եղել, ի՞նչ դիզվառելիքի մասին է խոսքը։ Չեմ հասկանում՝ պետությունը չգիտի՞, որ գարնանացանը սկսվում է մարտ ամսին, ոչ թե հունիսին»,- ասաց նա: «Մենք մոնիտորինգ ենք արել մոտ 1000 ֆերմերների շրջանում, և բոլորը դժգոհում են վրացական պարարտանյութից։ Գյուղացուն ասում են՝ փաստեր բեր, ապացուցի, ա́խր այդպես չի կարելի։ Մենք պետք է գյուղացու կողքին լինենք, ոչ թե ներկրողի։ Պատվիրատուին պետք էր վերահսկել, որ որակով պարարտանյութ մտներ Հայաստան»,- հավելեց  Բերբերյանը։ «Աշնանը ես ահազանգեցի, որ կարտոֆիլի ցանքատարածությունները կպակասեն, արդյունքում տեսնում եք, թե ինչ գների է հասնում կարտոֆիլը շուկայում:Այսօր վատ որակի կարտոֆիլը սուպերմարկետներում  250 կամ 280 դրամ  է, և գյուղացին ստիպված շուկա է հանել իր նախորդ տարվա սերմացուն»,- տեղեկացրեց Բերբերյանը։ ։ «Արդունքում՝ ունենք այն, որ գյուղեր կան, որտեղ 50 տոկոսով կարտոֆիլի ցանքատարածությունները պակասել են։ Այդ պատճառով մենք աշնանը կունենանք կարտոֆիլի գնագոյացում։ Սրա համար ո՞վ պիտի պատասխան տա»,- ասաց պարոն Բերբերյանը։ «Դեռևս աշնանը այդ հարցը քննարկել ենք վարչապետի հետ: Վարչապետն էլ հանձնարարական տվեց, որ հանկարծ այս ուղղությունը ձեռքներիցս բաց չթողնենք, քանի որ այն շահույթ է բերում գյուղացուն։ Սրան ուշադրություն դարձնելու փոխարեն՝ գարի բերեցին, որը հիմա պահեստավորված է, ոչ մեկին պետք չէ, բյուջեին էլ 200 մլն դրամի վնաս տվեցին։ Աշնանը ճտերը կհաշվենք և կտեսնենք, թե այդ գարին ի՞նչ են արել»։