Մեծ սկանդալ անձամբ Պուտինի համար. Թունավորման վարկած

Այսօր առավոտյան սկանդալային տեղեկություն ստացվեց Ռուսաստանից: Ռուս ընդդիմադիր գործիչ Ալեքսեյ Նավալնին հայտնվել է հիվանդանոցի վերակենդանացման բաժանմունքում, փաստաբանի վկայությամբ՝ նա թունավորված է:

Կոռուպցիայի դեմ պայքարի հիմնադրամի ղեկավարի ինքնազգացողությունը վատացել է օդանավում՝ Տոմսկից Մոսկվա թռչելիս, ինքնաթիռը շտապ վայրէջք է կատարել Օմսկում, որտեղ քաղաքական գործչին հոսպիտալացրել են անգիտակից վիճակում: Նավալնիի փաստաբան Կիրա Յարմիշը հայտարարել է, որ ընդդիմադիր գործչի մոտ տոքսիկ թունավորում է:

Քիչ առաջ տեղեկություն ստացվեց, Ռուսաստանցի ընդդիմադիր Ալեքսեյ Նավալնին շարունակում է գտնվել Օմսկի շտապ օգնության հիվանդանոցում՝ անգիտակից վիճակում։

Այսպես, Նավալնիի թիմակիցների ենթադրությամբ՝ ընդդիմադիր գործչին թունավորել են։ «Ալեքսեյը շարունակում է միացված մնալ թոքերի արհեստական օդափոխության սարքին։ Նա կոմայի մեջ է՝ ծանր վիճակում», - Twitter-ում գրել է Նավալնիի մամուլի քարտուղար Կիրա Յարմիշը։ Ընդդիմադիրները ենթադրում են, որ նրան թունավորել են օդանավ նստելուց անմիջապես առաջ։

«Նավալնիի թունավորումը դեռ հաստատված չէ, նրա ախտորոշումը կհստակեցվի օրվա ընթացքում», - «Ինտերֆաքս» գործակալությանը փոխանցել է Օմսկի թիվ 1 շտապ օգնության հիվանդանոցի գլխավոր բժշկի տեղակալ Անատոլի Կալինիչենկոն։
«Մեկ տարի առաջ Ալեքսեյին թունավորել են, երբ նա գտնվում էր կալանավայրում: Ակնհայտ է, որ հիմա էլ են նույնն արել»,- Կիրա Յարմիշը գրել էր այսօր Twitter-ի իր էջում:

Ըստ նրա՝ Նավալնիին թունավորել են թեյի մեջ ինչ-որ բան խառնելով: «Դա միակ բանն է, որ նա խմել է առավոտյան»,- հավելել էր Յարմիշը:

Ինտերֆաքսի փոխանցմամբ էլ՝ S7 ավիաընկերությունից հավաստիացրել են, որ Նավալնին օդանավում ոչինչ չի կերել ու չի խմել:

«Ասաց, որ իրեն վատ է զգում, ինձնից անձեռոցիկ խնդրեց, նա ամբողջովին քրտնել էր։ Խնդրեց, որ խոսեմ հետը, քանի որ ցանկանում էր կենտրոնանալ ձայնի վրա»,- ասել է Յարմիշը՝ նշելով, որ ջուր է առաջարկել, ինչից ընդդիմադիր գործիչը հրաժարվել է և փոխարենը գնացել է զուգարան, որտեղ էլ կորցրել է գիտակցությունը։

Տոմսկի բնակիչ Պավել Լեբեդևն իր հերթին հայտնել է, որ թռիչքի ժամանակ ուղևորները լսել են Նավալնիի ճիչերը․ նա տեսանյութ է հրապարակել ինքնաթիռից, որտեղ լսվում են տղամարդու բղավոցներ։

Մի շարք լրատվականներ հայտնում են, որ նախնական տվյալներով՝ կասկածներ կան, որ Նավալնիին թունավորել են նատրիումի օքսիբուտիրատով: Հիվանդանոցի բժիշկների փոխանցմամբ՝ անալիզների արդյունքները պատրաստ կլինեն այսօր ավելի ուշ։
Բոլոր լրատվամիջոցները հաղորդում են, որ Նավալնին Տոմսկի օդանավակայանի սրճարանում սև թեյ է խմել, այնտեղ ներքին ստուգում են անցկացնում։ Սրճարանի սեփականատերը «Ինտերֆաքսին» հայտնել է, որ կպարզի բոլոր հանգամանքները և կուսումնասիրի տեսախցիկների տեսագրությունները: Տոմսկի տրանսպորտային ոստիկանությունը ստուգում է սկսել օդանավակայանում։ Հիվանդանոցի տարածքը, որտեղ գտնվում է Նավալնին, հսկում են ոստիկանները։

Հիշեցնենք, որ մեկ տարի առաջ Ալեքսեյ Նավալնին հիվանդանոց էր տեղափոխվել Մոսկվայի հատուկ կացարանից, որտեղ վարչական կալանք էր կրում: Նրան հիվանդանոց էին տեղափոխել «սուր ալերգիկ ռեակցիա» ախտորոշմամբ։

Ռուս ընդդիմադիր գործչի՝ ծայրահեղ ծանր ու անգիտակից վիճակում գտնվելն, անկասկած, նոր սկանդալ է Ռուսաստանի համար ու անձամբ Պուտինի համար:
Բելառուսում Լուկաշենկոն երկրում տեղի ունեցածը արտասահմանից ուղղորդվող պրոցեսներ անվանեց: Կասկած չկա, որ նա Պուտինին ահազանգած կլինի նաև Ռուսաստանին սպասող նույն ճակատագրի մասին՝ «գունավոր հեղափոխության» իրականացմամբ:

Այս մթնոլորտում Ալեքսեյ Նավալնիի հնարավոր թունավորման վարկածով արևմուտքում մեղադրանքի սլաքները կուղղեն անձամբ Պուտինի ուղղությամբ:
Անհասկանալի է, թե այս մթնոլորտում, երբ ողջ աշխարհի ուշադրությունը Բելառուսի ուղղությամբ է, երբ բոլորը սպասում են, թե ինչ որոշում կկայացնի Պուտինը՝ Լուկաշենկոյի հետագա ճակատագրի հարցում, հանկարծ նոր սկանդալ է հասունանում ռուս ընդդիմադիր գործչի հնարավոր թունավորման շուրջ:

Մետաքսյա Շալունց