Արտակարգ դեպք Երևանում՝ ԱՄՆ դեսպանատան հարևանությամբ

Այսօր՝ մայիսի 14-ին, խոշոր հրդեհ է տեղի ունեցել Երևանում: Ժամը 00:15-ի սահմաններում Արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Իսակովի պողոտայում՝ ԱՄՆ դեսպանատան հարևանությամբ, Հանրապետական մանկական վերականգնողական կենտրոնի մոտ կուտակված փայտ է այրվում և կա վտանգ, որ հրդեհը կտարածվի հարևանությամբ գտնվող սեփական տներ: Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել է թիվ 1 հրշեջ-փրկարարական ջոկատը՝ մի քանի մարտական հաշվարկներով՝ փրկարար ծառայության ավագ լեյտենանտ Ղալաչյանի գլխավորությամբ: Հրշեջները կարողացել են ճիշտ և օպերատիվ գործողությունների արդյունքում նախ կանխել կրակի տարածումը, այնուհետև մեկուսացնել և մարել այն: Բարեբախտաբար, զոհեր և վիրավորներ չկան: