Կես տարվա հարկադիր STOP-ը

Հայաստանում մարտից հայտարարված արտակարգ դրության ժամկետն օգոստոսի 12-ից նորից կերկարաձգվի մեկ ամսով, բայց մի շարք սահմանափակումներ կվերանայվեն, օրինակ՝ հանրահավաքների ու հանրային միջոցառումների արգելքները, օրեր առաջ պարետատան նիստին հաջորդած ճեպազրույցում հայտնեց պարետ Տիգրան Ավինյանը։
«Վերանայվելու է օտարերկրյա քաղաքացիների մուտքի հնարավորությունների հարցը, վերանայվելու են ապրանքների արտահանման որոշակի սահմանափակումներ, վերանայվելու են հանրահավաքներ անցկացնելու հարցերը, վերանայվելու են հանրային միջոցառման հարցերը», - ասել էր նա:

Ուսումնական տարվան հաշված օրեր են մնացել, պարետատունը մշակել է նաև ուսումնական հաստատությունները վերաբացելու մոդելներ, որոնք կհրապարակվեն օգոստոսի 12-ին. - «Ամսի 12-ին արդեն վերջնական ամբողջական լուծումները և ոլորտային վերաբացումների հետ կապված, և հանրային միջոցառումների հետ կապված, և հանրահավաքների հետ կապված, և օտարերկրյա քաղաքացիների մուտքի հետ կապված, և մեր քաղաքացիների, ովքեր պետք է մեկնեն արտագնա աշխատանքի, նրանց խնդիրների հետ կապված, կարծում եմ` մենք բոլոր լուծումներն արդեն կհայտարարենք», հավելել էր նա:

Անվտանգության կանոնների պահպանման պահանջը ուժի մեջ է, ինչպես նաև տուգանքները: «Համաճարակային իրավիճակը շարունակում է մնալ Հայաստանի Հանրապետությունում բարդ, և եթե մեր արձագանքն այս իրավիճակին չլինի պատշաճ այն առումով, որ մենք առավել մեծ ջանքեր գործադրենք հակահամաճարակային կանոնները պահպանելու ուղղությամբ, մենք կարող ենք նորից իրավիճակը ետ գլորել դեպի հուլիսի առաջին շաբաթվա իրավիճակը, որը, ինչպես հայտնի է, մեր համաճարակային իրավիճակի պիկն էր և գագաթնակետը», նշել էր Փաշինյանը օրեր առաջ:

Այսպես, կառավարությունն ինչո՞ւ հետ չկանգնեց արտակարգ դրությունը ևս մեկ անգամ երկարաձգելու որոշումից, եթե դա հնարավոր էր իրականացնել օրենսդրական այլ միջոցներով հակահամաճարակային կանոնների վերահսկմամբ։
Կես տարի արտակարգ դրությունն ի՞նչ է տալիս կառավարությանը: Արդյոք երկրում կորոնավիրուսով վարակվածների թիվը նվազո՞ւմ է:

Ամենևին... Հայաստանը մի երկրիր է, որտեղ մահացության ու վարակվածների թվով «ռեկորդակիր» ենք: Ուրեմն, կառավարության արտակարգ դրությունը չի ծառայել իր հիմնական նպատակին:

Հետևաբար, ինչ խնդիր է լուծում իշխանությունը: Բնականաբար, բացառապես քաղաքական: Արտակարգ դրության պայմաններում հանրահավաքային հնարավոր պայքարի ձևերը կանխելու նպատակն էր:

Այսինքն, նույնիսկ տնտեսական անկման վտանգը Փաշինյանի համար ավելի տանելի է, քան՝ քաղաքական ընդդիմադիրների պայքարը: Հայաստանը ողջ աշխարհի համար համարվում է վտանգավոր պետություն, քանի որ մենք շարունակում ենք մնալ արտակարգ դրության պայմաններում:

Մինչդեռ Հայաստանից ավելի վատթար վիճակում գտնվող, կորոնավիրուսի իմաստով, երկրներ կան, որտեղ պաշտոնապես առումով արտակարգ դրության իրավական ռեժիմ հայտարարված չէ: Իսկ մեր երկրում արտակարգ դրության պայմաններում տուժում են արտագնա աշխատողները, այլ ոլորտներ, որոնք արտակարգ դրության պատճառով չեն կարողանում նորմալ գործել:

Բացի այդ, Հայաստանում արտակարգ դրություն է գործում արդեն 5 ամիս, մինչև սեպտեմբեր՝ կլրանա կես տարի, սակայն այն բացառապես աշխատում է դիմակ կգրելու ստուգելու պրոցեսում, այսինքն՝ արտակարգ դրություն չունեինք դե ֆակտո, բայց այն անվերջ շարունակեցին երկարաձգել՝ ունենալով մահացածության բավական բարձր ցուցանիշներ:

Մետաքսյա Շալունց