Մոսկվայում ձերբակալել են ԼԳԲՏ ակտիվիստների

Հինգշաբթի օրը Մոսկվայի իշխանությունները ձերբակալել են ԼԳԲՏ համայնքի մի խումբ ակտիվիստների, ովքեր ցանկանում էին մոտենալ Գլխավոր դատախազություն շենքին: Այս մասին հաղորդում է «Ամերիկայի ձայնը»: Մոսկվայում հինգշաբթի օրը ձերբակալվել են մի խումբ ակտիվիստներ, ովքեր դուրս էին եկել փողոց մեծ արկղերով, որոնց վրա գրված էր՝ «Արդարադատություն 100 չեչենների համար»: Արկղերում միջնորդության համար հավաքված անհրաժեշտ թվով ստորագրություններ էին ՝ ի պաշտպանություն Չեչնիայի բանտերում վերջին շաբաթների ընթացքում խոշտանգումների ենթարկված ավելի քան 100 մարդկանց, ովքեր անազատության մեջ են` նույնասեռական լինելու կասկածանքով: Իրավապաշտպան Նիկոլայ Կավակսկիի խոսքերով, «Շուրջ երկու միլիոն ստորագրություն էր հավաքվել, դրանց մի մասը տպված էր, իսկ մյուս մասը՝ հիշողության քարտի վրա: Ակտիվիստների նպատակը ստորագրութունները գլխավոր դատախազին փոխանցելն էր, ինչը դժբախտաբար չհաջողվեց»: Ըստ Ռուսաստանի օրենսդրության՝ չարտոնված հանրահավաքների մասնակիցները ենթակա են ձերբակալման, սակայն ակտիվիստները պնդում էին, որ իրենք դուրս չէին եկել բողոքի ցույցի: «Մենք պարզապես ցանկանում էինք ստորագրություններով լի արկղերը որպես միջնորդություն հանձնել Գլխավոր դատախազություն ՝ Չեչնիայի նույնասեռականների դեմ իրականացված բռնարարքների հետաքննության իրականացման նպատակով», – հայտնեց լրագրող և ակտիվիստ Նիկիտա Սաֆարովը: Ի աջակցություն իր դաշնակից և ընկեր Վլադիմիր Պուտինի՝ Չեչնիայի ներկայիս նախագահ Կադիրովը աչք է փակում Չեչնիայիում մարդու իրավունքների կոպիտ ոտնահարումներին: Նույնասեռականությունը չի հանդուրժվում Չեչնիայում և ԼԳԲՏ համայնքի ներկայացուցիչները հաճախ ենթարկվում են հետապնդումների, առևանգումների և կալանավորումների: «Եթե իմ ընտանիքն իմանար, որ ես գեյ եմ՝ ինձ վաղուց սպանած կլինեին: Նույնասեռական լինելն անհնար է մեզ մոտ»: Որոշ ակտիվիստներ Չեչնիայում տեղի ունեցող մարդու իրավունքների ոտնահարումների համար Պուտինին են մեղադրում: «Եթե Պուտինը զանգահարի Գրոզնի ու կարգադրի դադարեցնել բռնարարքները, Կադիրովը կանի նրա ասածը», գտնում է Human Rights Watch-ի Ռուսաստանի գրասենյակից Տանիա Լոկշինան: Չեչնիայի տարածաշրջանային դատախազությունը այս գործով հետաքննություն է սկսել, որը, ըստ էության, ֆորմալ բնույթ է կրում, քանի որ Չեչնիայի դատաիրավական համակարգը գտնվում է Ռամզան Կադիրովի անիմջական վերահսկողություն ներքո: Ակտիվիստները հույս ունեն, որ նրանց գործողությունները, այդ թվում`հինգշաբթի օրը տեղի ունեցած ձերբակալությունները, չեն անտեսվի միշաջզգային հանրության կողմից: