Աղմկահարույց կադրային ջարդի հետքերով

Այսօր լրատվականների թոփ լուրերի առաջին հորիզոնականում էր Սփյուռքի գործերով հանձնակատարի գրասենյակում վարչապետ Նիկոլ Փաշինյանի կողմից իրականացված կադրային ժարդը: Գրասենյակի 10-ց ավելի աշխատակիցների՝ վարչության պետերի եւ բաժնի պատասխանատուների Նիկոլ Փաշինյանն ազատել էր առանց հավելյալ պարզաբանման: Թե ինչո՞ւ, հարցն այս օդում կախված հուզում էր բոլորին: Հատկապես, որ կադրային այս հունձքին նախորդել էր ոչ պակաս աղմկահարույց տեղեկություն առ այն, որ Սփյուռքի հանձնակատարի գրասենյակի աշխատակազմը 7 ամսում 82.992.200 ՀՀ դրամ պարգևավճար է ստացել: Սփյուռքի գլխավոր հանձնակատարի գրասենյակն ունի 48 աշխատակից: Լրատվամիջոցների՝ պարգեւատրումների մասին կառույցից մայիս ամսվա ընթացքում ստացած պաշտոնական տվյալները համադրելով ստացվում էր, որ գրասենյակի աշխատակիցներին հատկացվել է միջինը 25.000 ԱՄՆ դոլարին համարժեք դրամ ամսական պարգևավճար, որն էլ համամասնորեն աշխատակիցների միջև բաժանելու դեպքում՝ ստացվում է յուրաքանչյուրին ամիսը 520 դոլար պարգևավճար:
Թե հատկապես ո՞ր կատարած աշխատանքի արդյունքում են պարգևատրվել նորաստեղծ կառույցի աշխատակիցները, որեւէ մեկին հայտնի չէր, թեեւ չարագուշակումներ էին արվում, թե օրնիբուն աշխատել են, ներդրումների ծով բերել Հայաստան, ներգաղթ կազմակերպել եւ այլն

Թվում էր, թե վարչապետը երկու ամիս անց որոշել է պատժել ոչինչ չարած, բայց իրենց մեծ պարգեւների արժանացրած պաշտոնյաներից, հատկապես, որ երկրում կորոնավիրուսով պայմանավորված ճգնաժամային իրավիճակ է եւ պետք է օպտիմալացնել բյուջեի համար բեռ դարձածներին: Գրասենյակը տեւական ժամանակ խորհրդավոր լռություն պահպանեց՝ չմեկնաբանելով համատարած ազատումների լուրերը, գլխավոր հանձնակատար Զարեհ Սինանյանն էլ արձակուրդում է, հավանաբար երկրում չէ եւ նրա կողմից էլ որեւէ պարզաբանում չլսվեց: Ավելի ուշ հայտնի դարձավ, որ դեռեւս երկու տարի առաջ իշխանությունների նախաձեռնած կառուցվածքային փոփոխություններից հետո համապատասխան փոփոխություն պետք է կատարվեր նախարարությունից վարչապետի ենթակայության տակ մտած այս կառույցի կառուցվածքում, որ համաձայն նոր կառույցի կանոնադրության՝ ընդամենը երեք վարչության պետ պետք է ունենար այն, ոչ թե մի քանի անգամ ավելի: Բայց քանի որ մեր իշխանությունում օրնիբուն աշխատում են, քիթը սրբելու ժամանակ չունեն անգամ պետական ապարատը օպտիմալացնելու եւ բյուջե տնտեսելու հարցում, ուստի երկու տարի շարունակ կառույցը գործել է ուռճացված աշխատակազմով, իսկ աշխատակզմը բյուջեի հաշվից միլիոնավոր պարգեւավճարներ է ստացել: Բա կոռուպցիան պոզով-պոճով է լինո՞ւմ: Կարծում ենք, որ միայն պաշտոնանկություններով գործընթացը չպիտի ավարտվի եւ մարդիկ, որոնք իրավասու չպետք է լինեին աշխատել կառույցում, բայց աշխատել ու վարձատրվել են, պետք է վերադարձնեն բյուջեի միջոցները:

Անի Սահակյան