Էդմոն Մարուքյանին եւ մյուսներին մեղադրանք կառաջադրվի՞

Քանի Հայաստանում իրավական համակարգի պատասխանատուներն իրավաբանությունից կիլոմետրերով հեռու սասունխաչատրյաններն ու արթուրդավթյաններն են, մեր երկրում իրավական ֆարսերի պակաս չի զգացվի։ Նախօրեին դրանց թիվը համալրվեց եւս մեկով։ Մեղադրանք առաջադրվեց «Ադեկվատ» միաբանության ղեկավար Արթուր Դանիելյանին այն բանի համար, որ նա բռնության էր ենթարկվել ԱԺ փոխնախագահ Ալեն Սիմոնյանի կողմից։

Հռհռալ պետք չէ, այո, հենց դրա համար է նրան մեղադրանք առաջադրվել, ըստ մեղադրանքի, որը խուլիգանություն է որակվել, եթե Արթուր Դանիելյանը խուլիգան չլիներ, ծեծ չէր ուտի։

Հիշեցնենք, որ այս տարվա ապրիլին է տեղի ունեցել միջադեպը, երկու կողմերի պատմածով Ալեն Սիմոնյանը քայլելիս է եղել եւ բարեւել Դանիելյանին, վերջինս էլ նրան քաղաքակիրթ լեզվով ասած անբարոյականի զավակ է անվանել, ինչից հետո իշխանական պաշտոնյան գլխով հարվածել է Դանիելյանի քթին, այն կոտրվել է եւ վիրահատության ենթարկվել։ ԱԺ փոխնախագահ Ալեն Սիմոնյանի և Արթուր Դանիելյանի հաղորդումների առթիվ նախապատրաստված նյութերի հիման վրա Հատուկ քննչական ծառայությունում ՀՀ քրեական օրենսգրքի 258-րդ հոդվածի 2-րդ մասի (խուլիգանություն, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով) և 117-րդ հոդվածի (դիտավորությամբ առողջությանը թեթև վնաս պատճառելը) հատկանիշներով մայիսին հարուցվել էր քրեական գործ: Երկու ամիս անց, միայն Դանիելյանին մեղադրանք առաջադրվեց, այն պարագայում, երբ բռնությունը կիրառվել էր Սիմոնյանի կողմից։ Բացի այդ, եթե առաջնորդվենք ՀՔԾ-ի երկաթյա տրամաբանությամբ, ապա նույն մեղադրանքը, կամ առնվազն խուլիգանության հոդված պետք է առաջադրել նաեւ ընդդիմադիր պատգամավոր Էդմոն Մարուքյանին, ով բառացիորեն մեկ օր առաջ խորհրդարանում Սիմոնյանի հետ լեզվակռվի ընթացքում նրան անվանեց «անբարոյականի զավակ»։

Իրավաբանները նկատեցին նաեւ՝ եթե արարքը, որն ակնհայտորեն անհարգալից վերաբերմունք չէր հասարակական կարգի հանդեպ (խուլիգանության դեպքում դա անհրաժեշտ է), այլ անհարգալից վերաբերմունք էր կոնկրետ անձի հանդեպ, արժանանում է քրեաիրավական գնահատականի, ապա հարվածողի արարքը ևս ՊԵՏՔ է արժանանա քրեաիրավական գնահատականի։ Հետևաբար, Ալեն Սիմոնյանին ևս պետք է մեղադրանք առաջադրվի։

Եւ առհասարակ, հայհոյաբերան իշխանականներին նույն սկզբունքով կարելի է մեղադրյալ ճանաչել, էլ չենք խոսում Նիկոլ Փաշինյանից, ով շուրջօրյա գրաֆիկով հայհոյում ու վիրավորում է նախկիններին։ ՀՔԾՇ-ն, ըստ էության, հերթական անգամ ցինիզմի ու ամենաթողության մաստեր կլաս ցուցադրեց։ Թեպետ այլ բան չէր էլ կարելի սպասել, իշխանության մոտ ձեռագիր է դարձել, հարձակվել, ջարդել, փշրել, հետո մեղադրել ծեծվողին, վնաս կրողին։ Այդպես եղավ Հայելի ակումբի վրա հարձակման գործով։

Որոշ լածիրակներ ձվերով հարձակվեցին լրատվամիջոցի վրա, վնասեցին գույքը, բայց հետո մեր դեմ հայց ներկայացրեցին միայն այն բանի համար, որ իրենց սեփական անուններով էինք կոչել, ինչն ընդունել էին վիրավորանք։

Անի Սահակյան