Կոկորդիլոսագետի նոր բոցը

Արարատի կոկորդիլոսագետ մարզպետ Գարիկ Սարգսյանը նոր էկզոտիկ զբաղմունք է գտել իրեն: Պաշտոնավարման առաջին օրից էկզոտիկ քայլերի ու հայտարարությունների սիրահար պաշտոնյան իշխանական թրենդից որոշել է հետ չմնալ, մխրչճվել է մարդկանց անձնական տարածք եւ գաղտնազերծել անձնական խոսակցությունները: Եթե կորոնավիրուսի դեմ պայքարի քողի տակ իշխանությունն իրեն իրավունք է վերապահում տեղորոշել քաղաքացիների հեռախոսազրույցները, եւ արդեն մի քանի ամիս է վերահսկում է մարդկանց խոսակցությունները, ով ում հետ է շփվում, ու եթե պետք է լսում են նաեւ կասկածելի շփումները, ապա ինչու մարզպետին չի կարելի առիթից օգտվել եւ այն, ինչ իշխանությունն անում է գաղտագողի, հանրայնացնել:

Անձնական խոսակցության գաղտնալսում Արարատի մարզպետարանի կողմից: Ահա, թե ինչով են զբաղված կոկորդիլոսագետի ղեկավարած հիմնարկում: Պետական մարմինը ֆեյսբուք սոիալական ցանցի մեսենջեր հատվածից անհայտ հանգամանքներում ներբեռնել է մարզի դպրոցներից մեկի ուսուցիչների ու ծնողների անձնական խոսակցությունը, գաղտնազերծել ու դա քիչ է, տեղադրել մարզպետարանի ֆեյսբուքյան պաշտոնական էջում:

Խոսակցությունը վերաբերում է Նորամարգ համայնքի դպրոցի տնօրենի՝ երկու անգամ տապալված ընտրությանը:

«Գիտեք, որ դպրոցի տնօրենի պայքար է գնում, եթե հիմա չպայքարենք ընկեր Գալստյանի համար, կարող է ինքը տնօրեն չլինի, որովհետեւ շատ չուզող մարդիկ կան»,- ասվում է գաղտնազերծած ձայնային հաղորդագրությամբ, որը ենթադրվում է` եղել է ծնողական համայնքի ներկայացուցչի կողմից:

Հիշեցնենք, որ գյուղի դպրոցի ուսուցիչները, համայնքի բնակիչները հուլիսի 23-ին, հավաքվել էին Կառավարության շենքի մոտ և բողոքում էին արդեն երկրորդ անգամ դպրոցի տնօրենի ընտրությունները տապալվելու համար: Հուլիսի 17-ին նշանակված առաջին ընտրությունը չէր կայացել՝ ԿԳՄՍ նախարարության 3 ներկայացուցիչների չներկայանալու պատճառով։ 5 աշխատանքային օր հետո՝ հուլիսի 23-ին, պետք է 2-րդ անգամ կայանար ընտրությունը, սակայն այս անգամ էլ ընտրությանը ներկա չեն եղել մարզպետարանի 2 և համայնքի 1 ներկայացուցիչը։

Նորամարգի դպրոցի գործավար, դպրոցական խորհրդի քարտուղար Լուսինե Դավթյանը news.am-ին ասել էր, որ սա արդեն երկրորդ անգամ է՝ հատուկ է արված։ Արարատի մարզպետ Գարիկ Սարգսյանը տապալում է ընտրությունները, որպեսզի գործող տնօրեն Ծովինար Գալստյանը չընտրվի։ «Եվ ըստ օրենքի՝ 2 անգամ տապալվելուց հետո ընտրություն չի լինելու, մարզպետի առաջադրած թեկնածուին փոխվարչապետը նշանակում է դպրոցի տնօրեն։ Մենք նամակով դիմել ենք փոխվարչապետին, որպեսզի Ծովինար Գալստանին նշանակի տնօրեն»,- ասել էր նա:

Նորամարգի դպրոցի տնօրենի պաշտոնի համար բացի գործող տնօրեն Ծովինար Գալստյանից, որին սատարում են ուսուցիչները և ծնողները, պայքարում է ևս 2 թեկնածու՝ Այնթապի դպրոցի փոխտնօրեն Գոհար Սահակյանը և Սիփանիկ համայնքի դպրոցի փոխտնօրեն Գևորգ Մինասյանը։ Գարիկ Սարգսյանի ցանկալի թեկնածուն Գոհար Սահակյանն է, քանի որ կան տեղեկություններ, որ ազգակցական կապեր ունի նրա հետ:

Փաստորեն, ստացվում է, որ Գարիկ Սարգսյանի կողմից կրկնահանցագործություն է տեղի ունեցել, նրա կազմակերպմամբ ոչ միայն տապալվել է մրցույթը, այլեւ ապօրինի գաղտնազերծվել անձնական խոսակցությունները՝ խախտելով մարդու իրավունքները: Ուսուցիչներն ու ծնողները այդ ապօրինությունները կվիճարկեն դատարանում:

Անի Սահակյան