Ադրբեջանական սադրանքներ՝ ողջ աշխարհի հայերի նկատմամբ

Աշխարհի տարբեր քաղաքներում հայերի և ադրբեջանցիների ցույցերն ուղեկցվում են միջադեպերով ու բախումներով: Գերմանիայում Հայաստանի դեսպանատան տեսախցիկները ֆիքսել են, թե ինչպես են հրկիզում դիվանագիտական առաքելության ծառայողական ավտոմեքենան, այս մասին երեկ հայտնեց Արտգործնախարարության մամուլի քարտուղարը: Ըստ դեսպանատան տարածած հաղորդագրության, գերմանացի իրավապահները դեպքի առթիվ ծառայողական քննություն են իրականացնում՝ դիտարկելով միտումնավոր հրկիզման վարկածը:

Վերջին շաբաթվա ընթացքում հայ-ադրբեջանական լարվածության ֆոնին թե՛ արտերկրում գտնվող հայերը, թե՛ ադրբեջանցիները բռնություններով ու այլ միջադեպերով ուղեկցվող բողոքի գործողություններ էին իրականացնում երկու երկրների դիվանագիտական ներկայացուցչությունների առաջ: Արդյունքում՝ կան տուժածներ ու բերման ենթարկվածներ:

Օրերս հայերի ու ադրբեջանցիների միջև բախում եղավ Բելգիայի մայրաքաղաք Բրյուսելում Ադրբեջանի դեսպանատան դիմաց: Հայերի և ադրբեջանցիների միջև բախումներ են եղել Լոս Անջելեսում, Լոնդոնում, Հաագայում, Քիշնևում, Վարշավայում ու այլ քաղաքներում:

Արտերկրում տեղի ունեցող խաղաղ ցույցերն, այսպիսով, մի կողմից կար որ են, Ադրբեջանի ագրեսիվ քաղաքականութան վրա ուշադրություն հրավիրելու առումով, սակայն մյուս կողմից, ակնհայտ է, որ հայ-ադրբեջանական հասարակական բախումները կարող են դուրս գալ վերահսկողությունից:

Տարբեր երկրների իրավապահները ինչ-որ պահից կարող են բախումների մասնակիցների օրենքի առջև պատասխանատվության ենթարկել:

Բանն այն է, որ ծեծկռտուքներ հրահրելը հենց Ադրբեջանին է ձեռնտու, հետո՝ դրանց վերաբերյալ ամբողջ աշխարհով կեղծ տեղեկություններ տարածել:

Պարզ է, Հայաստան-Ադրբեջան սահմանին տեղի ունեցած ռազմական գործողություններից հետո Ադրբեջանը չի հանդարտվում, փորձում են հակազդել նա Հայկական հզոր սփյուռքին՝ ցույց տալով, որ արտերկրում բնակվող ադրբեջանցիներն են «գոյություն ունեն»:

Անցած օրերին աշխարհի մի շարք երկրներում հայկական համայնքի ներկայացուցիչները շարունակում են տեղի ադրբեջանական դեսպանատների մոտ բողոքի ցույցեր կազմակերպել։ Ֆրանսիայում Ադրբեջանի դեսպանատան առջև հավաքված հայերը ծածանել են եռագույնն ու բղավել՝ «Ղարաբաղը մերն է»։ Դեսպանատան վերջին հարկերի պատուհաններից ադրբեջանցիներն իրենց դրոշն են ծածանել ու սադրել հավաքված խաղաղ ցուցարարներին, որպես պատասխան հայերը ձվեր են նետել շենքի ուղղությամբ, ոստիկանությունն արցունքաբեր գազ է կիրառել, երկու հայ ցուցարար բերման է ենթարկվել։

Լարված իրավիճակ էր նաև ԱՄՆ մայրաքաղաք Վաշինգտոնում։ Ֆեյսբուքյան տարբեր հայ օգտատերեր տեղից ուղիղ միացումներով ցույց էին տալիս, թե ինչպես են Ադրբեջանի դեսպանատան առաջ հավաքված հայերն ու ադրբեջանցիները բողոքի ակցիաներ կազմակերպել։ Հայերը մասնավորապես վանկարկել են` «Ալիև, ահաբեկիչ», «Արցախը մերն է», «Ադրբեջան ագրեսոր» և այլն։

Հոլանդական Հաագայում Ադրբեջանի դեսպանության դիմաց բողոքի ակցիա կազմակերպած հայ երիտասարդների ուղղությամբ ադրբեջանցիները պլաստիկե շշեր ու քարեր էին նետել:

Վրաստանում հայկական «Ալիք Մեդիա» կայքի փոխանցմամբ՝ հայ համայնքի նախաձեռնությամբ մի խումբ վիրահայեր Թբիլիսիում Հայաստանի դեսպանատան առջև նաև Վրաստանի հայերին են ուղերձ հղել՝ չտրվել սադրանքների, Վրաստանում «հաշիվներ չպարզել», ցուցաբերել բարձր քաղաքացիական պատասխանատվություն։
Ավելի վաղ Լեհաստանի մայրաքաղաք Վարշավայում էր ցույց կայացել: Ադրբեջանի դեսպանատան դիմաց հայ ցուցարարների խաղաղ ցույց էին ցանկացել անցկացրել: Ցույցի նախորդ օրն ադրբեջանցիներն իրենց սպառնալիքներով նամակներ են գրել՝ ուղարկելով ընտանիքի անդամների ու երեխաների նկարները։ Հայկական ցույցի կազմակերպիչը պնդում է՝ ադրբեջանցիների սադրանքի հետևանքով է խաղաղ ցույցը բախումների վերածվել։ Ոստիկանությունը ստիպված է եղել արցունքաբեր գազ ու ռետինե մահակներ օգտագործել, հայ է բերման ենթարկվել և շուրջ 1 տասնյակ ադրբեջանցիներ։

Լոնդոնում ևս բախումներ էին եղել։ Այստեղ էլ ադրբեջանցիներն են Մեծ Բրիտանիայում Հայաստանի դեսպանատան առջև բողոքի ցույց կազմակերպել։ Համացանցից տեղեկանալով այդ ցույցի մասին՝ տեղի հայերն ինքնակազմակերպվել ու հավաքվել էին հայկական դեսպանատան առջև։

Մետաքսյա Շալունց