Տիգրան Սարգսյանը հանդիպել է Դմիտրի Մեդվեդևի հետ

Եվրասիական տնտեսական հանձնաժողովի խորհրդի նախագահ Տիգրան Սարգսյանը հանդիպել է ՌԴ վարչապետ Դմիտրի Մեդվեդևի հետ։ Այդ մասին հայտնում է Ռուսաստանի կառավարության կայքը։ «Մենք վերջին անգամ հանդիպել ենք, երբ Դուք դեռ գլխավորում էիք Հայաստանի Հանրապետության կառավարությունը, իսկ այժմ Դուք ընդհանրապես մեծ ղեկավար եք՝ ղեկավարում եք վերազգային մարմին, որը ղեկավարում է այլ կառավարությունների գործունեությունը, մասնավորապես՝ մեր եվրասիական խորհուրդը»,- ասել է Մեդվեդևը և հաջողություններ մաղթել Տիգրան Սարգսյանին: Նա նշել է, որ դա թեկուզ բարդ, բայց, իր կարծիքով, հետաքրքիր աշխատանք է, քանի որ ուղղված է ինտեգրմանը, մեծ արդյունքների ձեռքբերմանը, որոնք շահավետ են Եվրասիական տնտեսական միության անդամ բոլոր երկրներին։ «Ես գիտակցում եմ ողջ պատասխանատվությունը, որը դրված է ինձ վրա, մեր երկրների կողմից լուրջ սպասումները, քանի որ և՛ մեր երկրների քաղաքացիները, և՛ բիզնեսը ցանկանում են ինտեգրումից իրական առավելություններ տեսնել, և մենք պետք է ցույց տանք, որ ինտեգրումն աշխատում է, և դա հավելյալ խթան կլինի ինտեգրացիոն գործընթացների համար»,- ասել է Տիգրան Սարգսյանը: «Իհարկե, Ձեր աջակցությունն, անկասկած, կօգնի մեզ առավել արդյունավետ առաջ շարժվել: Ես շնորհակալ եմ, որ Դուք ասացիք, որ մեր հանդիպումները պարբերական են լինելու։ Դա անշուշտ կօգնի մեզ շատ հարցեր հնարավորինս արագ լուծել»,- հավելել է Տիգրան Սարգսյանը։