Դատավարությունը կմեկնարկի ապրիլի 19-ին

Ստամբուլի Ծանր հանցագործությունների 14-րդ դատարանում հայ խմբագրապետ Հրանտ Դինքի սպանության վերաբերյալ նոր դատավարությունը, որին կցվել են սպանությունը չկանխած թուրք պաշտոնյաների գործերը, կմեկնարկի ապրիլի 19-ից։ Ինչպես տեղեկացնում է «Ակօս»-ը, դատական նիստերը տեղի են ունենալու Ստամբուլի արդարադատության պալատի մեծ դահլիճում՝ ապրիլի 19-ին, 20-ին և 21-ին։ Թուրքական ուժային կառույցների նախկին պաշտոնյաներ, այժմ կալանավորված Ալի Ֆուաթ Յըլմազերի, Ռամազան Աքյուրեքի, Էրջան Դեմիրի, Մուհիթթին Զենիթի և Օզքան Մումջուի կալանքի ժամկետները երկարաձգվել են։ Ոստիկանների թվում կան նախկինում բարձր պաշտոններ զբաղեցրած անձինք: Դինքն օրը ցերեկով գնդակահարվել էր 2007-ի հունվարի 19-ին Ստամբուլի Շիշլի թաղամասում իր թերթի՝ «Ակօսի» խմբագրության մուտքի մոտ։