Պաշտպանության նախկին նախարարը չճշտված հայտարարություն է անում.Գառնիկ Իսագուլյանը՝ Վաղարշակ Հարությունյանին
«Առիթ ունեցա լսելու պարոն Վաղարշակ Հարությունյանի հարցազրույցը: Այն, ինչը ասվեց ասուլիսի ժամանակ, ճիշտ չէր: Ինձ համար հատկապես մտահոգիչ է տեսակետը, որ Հարությունյանը նշեց, թե Հայաստանի երեք նախագահներն էլ միշտ պատրաստ են եղել տարածքներ զիջելու, բայց Ադրբեջանը ուզում է ամբողջությամբ»,-Հայելի.am-ի թղթակցի հետ զրույցում՝ անդրադառնալով պաշտպանության նախկին նախարար Վաղարշակ Հարությունյանի հնչեցրած հայտարարությանն, ասաց «Ազգային անվտանգություն» կուսակցության նախագահ Գառնիկ Իսագուլյանը: Իսագուլյանի խոսքով՝ նախագահները երբևէ պատրաստ չեն եղել տարածքներ զիջելու. «Նախագահները երբեք չեն հայտարարել, թե պատրաստ են տարածքներ զիջելու: Ճիշտ չեմ համարում, որ պաշտպանության նախկին նախարարը նման չճշտված հայտարարություն է անում: Դա կարող է տպավորություն ստեղծել հասարակության մոտ, թե մեր նախագահները պատրաստ են եղել տարածքներ զիջելու: Տարածքներ զիջելը որևէ մեկի անձնական գործը չէ, մանավանդ, որ մենք ունենք Սահմանադրություն, անկախ պետականություն, ժողովուրդ, որը ասում է իր խոսքը ու քվեարկում է»: Իսագուլյանը անդրադարձավ նաև Վաղարշակ Հարությունյանի դիտարկմանը, թե զոհված զինվորները մեր հաղթանակի գինն են. «Այս հայտարարությունը ևս տեղին չէր: Ես ուղղակի խնդրում եմ մեր բոլոր քաղաքական գործիչներին և քաղաքագետներին, առավել ևս ուսադիր կրողներին, որ նման արտահայտություն չանեն: Մեր ամեն զինվորի կյանքն անգին է:Այլ հարց է, որ մեր հայրենիքը պաշտպանելիս յուրաքանչյուրս պետք է պատրաստ լինենք զոհաբերել ամենաթանկը: Բայց սա հաղթանակի գինը չէ»,-ասաց Իսագուլյանը: Իսագուլյանը փաստեց, որ մենք պետք է կարևորենք Հայաստանի Հանրապետության և Լեռնային Ղարաբաղի Հանրապետության ընդհանուր նպատակները: Քաղաքական գործիչը անդրադարձավ նաև Ադրբեջանի Պաշտպանության նախարար Զաքիր Հասանովի հայտարարությանը, որում ընդգծվում էր. «Ամեն ինչ կանենք, որ հայ մայրերը ստանան իրենց երեխաների դագաղները»: «Չեմ կարծում, որ Ադրբեջանի նման կարգի հոխորտանքը կարող է ազդել մեր բանակի, մեր պետությունների կամ սպաների վրա»,-եզրափակեց Իսագուլյանը: Լուսինե Ղազարյան
Հետևեք մեզ Viber-ում
