Փաշինյանը կմեկնի՞ ռազմական շքերթին. Ալիևը խուսափեց Պուտինից

Ադրբեջանի նախագահ Իլհամ Ալիևը երեկ զանգահարել է Ռուսաստանի նախագահ Վլադիմիր Պուտինին: Ինչպես երեկ հաղորդեցին ադրբեջանական լրատվամիջոցները, Ալիևը տեղեկացրել է Պուտինին, որ չի կարող մասնակցել Մոսկվայում Հաղթանակի 75-րդ ամյակին նվիրված ռազմական շքերթին, քանի որ Ադրբեջանում երկարացվել են կարանտինային միջոցառումները:

Նշվում է, որ ռազմական շքերթին մասնակցելու է Ադրբեջանի պաշտպանության նախարարը և 75 զինծառայող:

Ըստ հաղորդագրության՝ Պուտինն իր հերթին ասել է, որ ըմբռնումով է մոտենում իրավիճակին: Ռուսական լրատվամիջոցներն էլ՝ հղում անելով Կրեմլի հաղորդագրությունը, գրում են, որ հեռախոսային զրույցի ընթացքում կողմերը քննարկել են երկկողմ հարաբերությունների հետագա զարգացման հարցերը, ինչպես նաև կորոնավիրուսի համավարակի շուրջ ստեղծված իրավիճակը։

Ինչպես հայտնի է, Փաշինյանը մեկնելու է Մոսկվա՝ Հաղթանակի 75-րդ ամյակին նվիրված ռազմական շքերթին մասնակցելու նպատակով:

Ալիևի հրաժարումը ուշագրավ պահի է տեղի ունենում: Ի հայտ են եկել ռուս-թուրքական անսպասելի խնդիրներ: Ռուսական կողմը բռնել է Հունաստանի կողմը: Թուրքիան էլ ՆԱՏՕ-ում ընդդեմ Ռուսաստանի քայլերի կարող է միանալ՝ իր պահանջների բավարարման դեպքում:

Մյուս կողմից՝ Դաղստանի սահմանին ադրբեջանցիները պարբերաբար անկարգություններ են հրահրում, տեղի իրավապահները ստիպված են լինում ուժ կիրառել կարգուկանոն հաստատելու համար: Այս առումով՝ ռուս-ադրբեջանական հարաբերություններում որոշակի լարվածության հիմքեր կարող են առաջանալ:
Մյուս կողմից՝ Արցախի խնդիրն է: Թուրքիան ու Ադրբեջանը սպասելիքներ ունեն Ռուսաստանից: Նրանք ակնկալում են, որ Մոսկվան ճնշումներ պետք է գործադրի Հայաստանի ուղղությամբ: Հայաստանի իշխանությունները, Արցախից հնչող հայտարարությունները, ըստ երևույթին հիմք են տալիս Բաքվին ու Անկարային կարծելու, որ ռուսական կողմը սպասված ճնշումներն, այնուամենայնիվ, չի գործադրում Հայաստանի ուղղությամբ:

Արցախի հակամարտության կարգավորման հարցով հաջորդ հանդիպումը՝ տեսակապի ձևաչափով, տեղի կունենա հունիսի վերջին, երեկ այս մասին հայտարարեց ՌԴ ԱԳՆ խոսնակ Մարիա Զախարովան ճեպազրույցի ժամանակ: «Համանախագահները մշտական կապի մեջ են Հայաստանի և Ադրբեջանի արտգործնախարարների հետ: Անցած ամիս նրանք համատեղ տեսակոնֆերանս են անցկացրել, որի ժամանակ քննարկվել է ղարաբաղյան կարգավորման հարցը: Հերթական հանդիպումը նախատեսվում է մինչև ամսվա վերջ, մենք հավելյալ կտեղեկացնենք, իհարկե»,-ասել է Զախարովան:
Նա նաև հավելել է, որ ավիահաղորդակցության սահմանափակումների չեղարկումից հետո կողմերը կշարունակեն դեմ առ դեմ բանակցությունները:

Մետաքսյա Շալունց