Խոշոր ավտովթար «Գազպրոմ Արմենիա» ընկերության մոտ

Այսօր՝ մայիսի 7-ին, խոշոր ավտովթար է տեղի ունեցել Երևանում: Ժամը 06:00-ի սահմաններում Երևան քաղաքի Լուկաշինի փողոցի բնակիչ, 27-ամյա Գարեգին Գոգջյանը Թբիլիսյան խճուղու թիվ 43 շենքի դիմաց՝ «Գազպրոմ Արմենիա» ընկերության մոտ, իր վարած Nissan մակնիշի 35 DT 292 համարանիշի ավտոմեքենայով բախվել է երկաթե ցանկապատներին և այն կոտրելով՝ բախվել գովազդային վահանակի սյանը: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդ Գ. Գոգջյանը, նրա ուղևորներ՝ Երևան քաղաքի Լուկաշինի փողոցի բնակիչ, 27-ամյա Մարգարիտա Սարկիսովան և Ֆիլիպինների քաղաքացիներ, 32-ամյա Ադելինե Մենդոզան, 32-ամյա Ջոան Էսպեռռագոն, 35-ամյա Լոուրդես Կրիստեն մարմնական վնասվածքներով տեղափոխվել են Սուրբ Գրիգոր Լուսավորիչ բժշկական կենտրոն: Վիրավորներին առաջինը օգնության են հաասել «Գազպրոմ Արմենիա» ընկերության աշխատակիցները: Դեպքի վայր են ժամանել ճանապարհային ոստիկանության 1-ին սպայական գումարտակի ծառայողները: Վթարի մասին ՃՈ օպերատիվ կառավարման կենտրոնի պատասխանատու հերթապահ Արսեն Հարությունյանը տեղեկությունը փոխանցել է ՃՈ ճանապարհատրանսպորտային պատահարների գործերով հետաքննության և վարչական վարույթի իրականացման բաժանմունք, որտեղից ժամանել է ավագ հետաքննիչ, ոստիկանության կապիտան Արարատ Թևոսյանը, ում կողմից փաստի առթիվ նյութեր են նախապատրաստվում: Ավտոմեքենան Ա. Թևոսյանի հանձնարարականով տեղափոխվել է Երևանի ՃՈ պահանվող հատուկ տարածք: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: