Կծիկը քանդվում է` Դավիթ Անանյանից հետո նոր պաշտոնանկություններ կլինեն

ՊԵԿ նախագահ Դավիթ Անանյանը հրաժարական է տվել։ Այս մասին ՊԵԿ արդեն նախկին նախագահը հայտնել է Ֆեյսբուքյան իր էջում. <<Մամուլում շրջանառվող լուրերը փարատելու նպատակով, ցանկանում եմ տեղեկացնել, որ այսօր ՀՀ Վարչապետին եմ ներկայացրել աշխատանքից ազատման դիմում։

Շնորհակալություն եմ հայտնում բոլորին արդյունավետ և արգասաբեր համագործացկության, ինչպես նաև ՀՀ Վարչապետ Նիկոլ Փաշինյանին՝ ավելի քան երկու տարի այս պատասխանատու պաշտոնն ինձ վստահելու համար>>,- նշել է Դավիթ Անանյանը։ Հրաժարականի պատճառների մասին որևէ բացատրություն Դավիթ Անանյանը չի տվել, բայց, ամենայն հավանականությամբ, նրա պաշտոնանկությունը կապված է մաքսանենգ ծխախոտի սկանդալային պատմության հետ:

Hayeli.am-ը դեռ օրեր առաջ կանխատեսել էր, որ ՊԵԿ նախագահը կարող է ազատման դիմում գրել: Երբ վարչապետ Նիկոլ Փաշինյանը Ազգային ժողովի վերջին հարց ու պատասխանի ժամանակ անդրադարձավ մաքսանենք ծխախոտի և Վատիկանում ՀՀ նախկին դեսպան Միքայել Մինասյանի բացահայտումների խնդրին, մենք գրել էինք, որ եթե Նիկոլ Փաշինյանի ներկայացրած պարզաբանումները ճշմարիտ են, ուրեմն Դավիթ Անանյանը պետք է ազատման դիմում գրի կամ էլ հերքում տարածի, որ վարչապետը սուտ տեղեկատվություն է ներկայացրել: Փաստորեն Դավիթ Անանյանը դիմում գրեց` այսպիսով դառնալով ծխախոտային սկանդալի զոհը: Հնարավոր է, որ Դավիթ Անանյանի պաշտոնանկությանը այլ գործոններ և հանգամանքեր ևս նպաստել են, բայց մաքսանենգության միջպետական սկանդալային պատմությունները ինչ-որ մեկի վրա պետք է կոտրվեին:
Կառավարությունը, վարչապետն ու ինքը` ՊԵԿ արդեն նախկին նախագահը, պարտավոր են ներկայացնել հրաժարականի պատճառները: Հանուն արդարության պետք է նշել, որ Դավիթ Անանյանը` որպես ՊԵԿ նախագահ, արդյունավետ է աշխատել. բյուջետային հավաքագրումների խնդիրը նախատեսված ողջ ծավալով, դեռ մի բան էլ ավելի նա կատարել է, և վարչապետ Նիկոլ Փաշինյանը հրապարակավ  բարձր է գնահատել նրա աշխատանքը:
Ընդամենը մեկ ամիս առաջ Ազգային Ժողովում 2019թ․ բյուջեի կատարողականը ներկայացնելու ժամանակ վարչապետ Նիկոլ Փաշինյանը հայտարարեց, որ 2018-2019 թթ. հաջողվել է պետական բյուջեի հարկային եկամուտների ցուցանիշն ավելացել է 505 մլրդ դրամով, որն ավելի քան 1 մլրդ դոլար է կազմում: Հարց է առաջանում` եթե մարդն այսքան լավ է աշխատել, ինչո՞ւ է հրաժարական տալիս: Իրականում չի եղել որևէ դեպք, երբ Նիկոլ Փաշինյանը դժգոհություն հայտնած լինի ՊԵԿ-ի գործունեությունից: Նա Դավիթ Անանյանին պաշտոնից չազատեց անգամ այն ժամանակ, երբ հասարակությունը պահանջում էր պատժել նրան` ֆանտաստիկ բարձր պարգևավճարների համար: Փաշինյանն անձամբ հայտարարեց, թե ՊԵԿ-ը արդյունավետ է աշխատում և արժանի է բարձր խրախուսման: Պետք է ընդունել, որ Անանյանը համակարգում ճանապարհ է անցել և պետեկամուտների համակարգին տիրապետում է: Եթե նրա տեղում հայտնվի ոլորտից անտեղյակ մի քայլող կադր, հնարավոր է, որ կարճ ժամանակ անց հարցականի տակ դրվի թոշակների և աշխատավարձերի ժամանակին վճարումը:

Ծխախոտային սկանդալի բացահայտման ժամանակ Միքայել Մինասյանը հայտարարել էր, որ օպերացիան կազմակերպել է ՊԵԿ նախագահի տեղակալը, որը, ըստ մամուլի հրապարակումների, վայելում է վարչապետի տիկնոջ` Աննա Հակոբյանի բարձր աջակցությունը: Անկախ նրանից, թե ով է իրական մեղավորը, պարզ է, որ կատարվածի քաղաքական պատասխանավությունը առաջին դեմքն է կրում: Ամեն դեպքում Նիկոլ Փաշինյանի կաբինետը ոլորտային ձախողումների և սկանդալների ծանր շրջափուլում է հայտնվել: Չի կարելի բացառել, որ Դավիթ Անանյանից հետո նոր պաշտոնակություններ ևս կլինեն: Կծիկը սկսել է քանդվել, և Դավիթ Անանյանը չի կարող միակը լինել:

Հայկ Դավթյան