Դասեր չքաղելու նուրբ արվեստը, Փաշինյանը վտանգավոր է դառնում

Նիկոլ Փաշինյանը երկու օր առաջ տեղեկացրեց, որ ինքն ու ընտանիքը վարակվել են նոր տեսակի կորոնավիրուսով, բայց նրանցից որեւէ մեկն ախտանիշ չունի, այսինքն ասիմպտոմ վարակակիրներ են, վարչապետի ինքնազգացողությունն էլ լավ է, ուստի կշարունակի աշխատանքը տանից: Թե ինչպես ստեցվեց, որ վերջին օրերին դիմակների գովազդային գործակալ դարձած վարչապետին կպավ կորոնավիրուսը, իսկ ինքն էլ վարակեց ողջ ընտանիքին, սա գիտի միայն Նիկոլ Փաշինյանը: Իսկ շատերը կասկածում են ընդհանրապես նրանց վարակման փաստի առթիվ, համարում, որ դա էժան փիար ակցիա է, որով վարչապետը փորձում է մնալ թրենդի մեջ եւ այլ երկրների ղեկավարներից հետ չմնալ ու ձեռքի հետ էլ ցույց տալ, թե նույնիսկ վարակված վիճակում է շարունակում աշխատել հանուն իր երկրի ու ժողովրդի:

Եթե ընդունենք, որ վարչապետն իսկապես վարակվել է կորոնավիրուսուվ եւ այժմ ինքնամեկուսացված է, ապա պետք է փաստենք, որ վարակակիր Փաշինյանը դասեր չի քաղել իր ստեղծված իրավիճակից եւ շարունակում է նույն անլրջությամբ մոտենալ հարցին, ինչպես ամենասկզբում էր, երբ կորոնավիրուսն իր ոտքով եկել էր Հայաստան, իսկ վարչապետն ու իր թիմը Սահմանադրական դատարանի դեմ իրականացվող հանրաքվեի քարոզարշավն էին իրականացնում ու այս վարակին մատների արանքով նայում, հումորներ անում, թե սովորական վիրուս է, պինցետով կբռնենք, արաղով կախտահանենք, մի խոսքով՝ կորոնավիրուսն ում շունն ա սկզբունքով առաջնորդվում:
Այս անլուրջ եւ անպատասխանատու վարքագծի արդյունքում է, որ այսօր ունենք այն, ինչ ունենք, մինչդեռ պետության ղեկավարը դասեր չի քաղել այս վիճակից եւ շարունակում է նույն ոճով:

Նա մեղադրում է բոլորին՝ կարի ֆաբրիկայի աշխատակիցներին, հունիսմեկյան միջոցառում կազմակերպած ծնողներին, բանկերին ու բոլոր բոլորին բացի, անշուշտ, իրենից: Արդեն երկու օր է վարակակիր Փաշինյանը պարետատան նիստեր է անցկացնում կառավարական ամառանոցում եւ շփվում տարբեր պաշտոնյաների, բուժհիմնարկների պատասխանատուների հետ:
Այսպիսով վարչապետը խախտում է մեկուսացման կանոնները եւ կարող է վարակի փոխանցման աղբյուր դառնալ: Դեռեւս մարտին խորհրդարանը Վարչական օրենսգրքում փոփոխություններ կատարեց, որպեսզի մեկուսացման կամ ինքնամեկուսացման պայմանները խախտող վարակակիրները վարչական պատասխանատվության ենթարկվեն, տույժ-տուգանք մուծեն, իսկ երբ դիմացինին վարակելը ողբերգական ավարտ ունենա, ապա նաեւ կալանք է նախատեսված:
Հետեւաբար ճիշտ կլինի, որ ուրիշների լուսանկարները տարածելուց առաջ եւ այսպես կոչված անպատասխանատու պահվածքը քննադատելոի փոխարեն վարչապետը նախ իրենից սկսի, եթե, իհարկե, իր վարակված լինելու փաստը կեղծ չէ, պետք է թողներ այս ամբողջ շոուն ու աշխատանքներն իրականացներ հեռավար: Եւ չզբաղվել դեմագոգությամբ, հրապարակելով լուսանկարներ, թե տեսեք՝ ահա ինչու են թվերը դառնում ռեկորդային:

Եթե կան մեղավորներ դրանցից մեկն էլ, գուցե հենց առաջինը դուք եք՝ նախ անպատասխանատու եւ անլուրջ հայտարարություններով, հիմա արդեն պահվածքով:

Անի Սահակյան