Ահա թե ում շունն է կորոնավիրուսը կամ օպերացիա «Ճ»

Նիկոլ Փաշինյանն այսօր տեղեկացրեց, որ ինքն ու ընտանիքը կորոնավիրուսով են վարակվել։ Դա հականվեր էր իր իսկ ծննդյան օրով։

Ճակատագրի հեգնանքն այն է, որ նա համաճարակի տարածման սկզբում հայտարարում էր, թե կորոնավիրուսն ում շունն է, որ իր ծրագրերը փոխի։ Փաստորեն, փոխե՛ց։ Փոխեց արմատապես, քանզի «ժողովրդի» վարչապետը չկարողացավ հանրաքվեի «այո»-ն անցկացնել և ՍԴ-ն դնել գրպանը։

Ի՞նչ է սպասվում սրանից հետո և ինչո՞ւ այս պահին հիվանդացավ Փաշինյանը։

Կորոնավիրուսն ո՞ւմ շունն է

Նիկոլն ասում է, որ կորոնավիրուսով վարակվել է, և այս հարցում կարծիքները կիսվել են։ Մարդկանց մի մասը հավատում է, որ դա այդպես է և մեղադրում է նրան ձախորդ փանոսության մեջ, որ ինքն իրեն չի կարողացել պաշտպանել, երկրին ու տնեցիներին գցել է կրակը։

Նիկոլը վերջին օրերին դարձել էր դիմակի գովազդային գործակալ, բայց դա էլ չփրկեց, փաստորեն։ Նա արդեն վարակվել է ու «լայվ» է մտնում առանց դիմակ՝ «իմ վարակվելուց հետո մյուսների հերն էլ անիծած» տարբերակով։ Դիմակ չկրելու ավելի լավ գովազդ Նիկոլի կատարմամբ դժվար է պատկերացնել։

Եթե Փաշինյանը չի ստում և իրոք վարակվել է կորոնավիրուսով, ապա նրան պետք է առողջություն մաղթել։ Թո՛ւ, թո՛ւ, թո՛ւ․․․

Օպերացիա «Ճ»

Հայտնի կոմեդիայի հերոսը հանցանքի գնալու օպերացիայի անվանումն առաջարկում էր դնել «ы», որպեսզի որևէ մեկը գլխի չընկնի։ Հիմա կարծես նման մի բանի ենք ականատես լինում։

Բանն այն է, որ կա նաև տեսակետ, որ Փաշինյանն, ինչպես միշտ, ստում է և չի վարակվել կորոնավիրուսով։ Այս տեսակետը դոմինանտային է անգամ պողոսական շրջանակներում։

Հարց կարող է առաջանալ, թե ինչո՞ւ է նա ստում և ինչո՞ւ է նրան հիմա պետք եկել զոհի ու հիվանդի կերպարի մեջ մտնելը։ Պատճառները կարող են մի քանիսը լինել՝

1. Փաշինյանը թաղվել է կոռուպցիոն ու թալանչիական սկանդալների մեջ։ Ասելիք չունի։ Հերքելիք չունի։ Մնում է «սուտ մեռուկ» ձևանալը, մինչև «շուխուռն» անցնի։

Դատելով ամենից՝ նա Միքայել Մինասյանի ներկայացրած փաստերին հակադարձելու բան չունի։ Փորձեց աներձագով պատասխանել, բայց է՛լ ավելի վատացրեց իր վիճակը։ Մնաց «վարակվելու» տարբերակը։

Այսինքն՝ տվյալ դեպքում գործ ունենք օպերացիա «Ճ»-ի հետ։ Այդ օպերացիայի շրջանակներում հույս ունեն հնդկական սերիալների սիրահարներից արտասուք քամել ու թալանի թեման շեղել։ Քանի՞ չորքոտանու կկարողանան համոզել, թող կոոպերատիվ «Գելափը» հաշվի։

2․ Փաշինյանը շատ լավ գիտի, որ տապալել է համաճարակի դեմ պայքարը և հիվանդ ձևանալով փորձում է փախչել պատասխանատվությունից՝ «Ես ի՞նչ կարող էի անել, ես էլ էի վարակվել, ամեն ինչի համար մեղավորը պարետն ու առողջապահության նախարարն են» թեմայով։ Նիկոլի կինն, ի դեպ, վերջին հարցազրույցում արդեն նրանց անունները տալիս էր որպես քավության նոխազ։

Փաշինյանը տեղյակ է, որ հիվանդանոցներում տեղ չկա և մարդկանց ուղարկում են տանը առողջանալու կամ մեռնելու․ նայած՝ ում բախտն ինչպես բերի։ Հիմա ինքն ուզում է ցույց տալ, թե բա տեսեք ժողովուրդ ջան, ես մեկն եմ ձեզանից, ես էլ եմ տանը բուժվում։

Փաշինյանը «հիվանդանալով» փորձում է թռնել ու ապագայում մեղքն այլոց վրա բարդել ճիշտ այնպես, ինչպես թռավ 2008-ի մարտի 1-ին՝ մարդկանց տանելով կրակի բերան, նրանց փուռը տալով ու դեպքի վայրից ծլկելով։

Փաշինյանը ներսից գիտի, որ կոլապս է լինելու առողջապահության ու տնտեսության ոլորտներում, դրա համար էլ ձեռքերը լվացել և ինքնամեկուսացել է՝ հանցավոր անգործություն ու անպատասխանատվություն ցուցաբերելով։

3․ Ադրբեջանը վերջին շրջանում շատ կոշտ ու ագրեսիվ ռազմատենչ հայտարարություններ է անում։ Պաշտոնական Երևանը լռում է։ Փաշինյանը որևէ կերպ չի անդրադառնում իր սիրելի, իր իսկ կողմից կիրթ և կառուցողական որակված Ալիևի ծավալապաշտական հայտարարություններին։

Փորձագիտական շրջանակների կարծիքով, մենք պատերազմական գործողությունների վերսկսման նախաշեմին ենք։ Նիկոլն, ըստ ամենայնի, գիտի այդ մասին։ Գիտի ու որոշել է թռնել՝ պատասխանատվությունը թողնելով այլոց վրա։

Կկարողանա մեր ռազմական գերատեսչությունը պատասխանել ադրբեջանական հնարավոր հարձակմանը՝ ինքը դա կվերագրի իրեն ու շատ արագ կլավանա կորոնավիրուսից։ Չի կարողանա, մեղքը կբարդի Արցախի նոր իշխանությունների և Դավիթ Տոնոյանի վրա։

Չի բացառվում, որ այս երեք տարբերակների համադրությունը լինի փաշինյանական սուտ հիվանդության հիմքում։

Ամեն դեպքում շատ վատ է, որ երկրի ղեկավար է դարձել մեկը, ում խոսքը որևէ հավատ չի ներշնչում և անգամ հիվանդանալուն քչերն են հավատում։ Ինչպես ասում են՝ ստախոսի տանը հրդեհ է բռնկվում, կանչում է օգնության, ոչ մեկ չի գալիս, քանզի չեն հավատում։ Արդյունքում․․․

Արեգնազ Մանուկյան

7or.am