Բաքվում «պահանջել են պատերազմ Ղարաբաղում». Ինչու է Ալիևը ձերբակալում

Մայիսի 26-ին մի խումբ մարդիկ փորձել են «Պահանջում ենք պատերազմ Ղարաբաղում» կարգախոսով ցույց անցկացնել Բաքվում՝ խորհրդարանի շենքի մոտ:

Ինչպես հաղորդում է Turan ադրբեջանական գործակալությունը, ցույցի մասնակիցները խորհրդարանին մեղադրել են երկրի շահերը չպաշտպանելու համար:

«Հայերը Շուշին մայրաքաղաք են հռչակում, իսկ մեր խորհրդարանի 99 պատգամավորները համաձայնություն են տալիս Իրանից կամրջի կառուցմանը… այդ պատճառով մենք բողոքի ցույց ենք անցկացնում»,-ասել է ցույցի մասնակիցներից մեկը:
Այնուհետև, ադրբեջանական լրատվամիջոցները հայտնել են, որ դեպքի վայր են ժամանել ոստիկանական ուժեր, ցրել են բողոքի ցույցը և ձերբակալել են մասնակիցներին: Նրանց թվում է եղել նաև «Մուսավաթ» կուսակցության անդամ Իլգար Մահմուդը:

Մի կողմից թվում է, թե ադրբեջանցի ցուցարարների պահանջում են առանձնապես ոչ արտառոց բան. Պաշտոնական Բաքուն էլ պարբերաբար չի բացառել պատերազմով «օկուպացված տարածքների վերադարձ»: Սա պաշտոնական Բաքվի քաղաքականությունն է, որի համար տարիներ շարունակ քարոզչություն է իրականացվել:

Նախ, իշխանավորները ցրել են ցույցը՝ ունենալով որոշակի վախեր՝ ներքաղաքական առումով: Յուրաքանչյուր հարցով բողոքի ցույցերը Ադրբեջանում իշխանության համար լուրջ անհանգստության պատճառ է:

Սակայն, մյուս կողմից իրավապահների նման պահվածքով, պատերազմ պահանջողներին ձերբակալելով Ալիևը ցույց է տալու, իր երկիրն էլ խաղաղ բանակցությունների կողմնակից է ու իսկ ինքը՝ «կառուցողական» իշխանություն է:

Իրականում, լինելով պատերազմի կողմնակից, ռազմատենչ քաղաքականություն իրականացնող թիվ մեկ պատասխանատու Ալիևը խորամանկորեն ցույց է տալիս իր «կառուցողականությունը»:

Ներքաղաքական կյանքում ընդդիմադիրների ցանկացած հավաք ցանկացած պահանջով Ալիևը մշտապես ոչնչացնելու է, նույնիսկ «Ղարաբաղ պահանջողներին»: Հարցն այն է, որ նույնիսկ քաղաքական վախերով՝ Ալիևը խորամանկորեն ցույց է տալիս «խաղաղ բանակցողի» իր կերպարը:

Մետաքսյա Շալունց