Ադրբեջանն այս տարի 22 զինծառայող է կորցրել. Կասպյան ռազմական ինստիտուտ

Կասպյան ռազմական ինստիտուտը  հրապարակել է 2017թ. առաջին 4 ամիսներին ադրբեջանական բանակի կրած կորուստների վերաբերյալ վիճակագրությունը՝ հայտնում է ադրբեջանական Meydan tv-ն: Ադրբեջանի զինված ուժերը 2017թ. առաջին 4 ամիսներին կորցրել է 22 զինծառայող: 22 զինվորականներից 12-ը սպանվել են սահմանային բախումների արդյունքում, իսկ 10-ը մահացել են խաղաղ պայմաններում: Կասպյան ռազմական ինստիտուտի հրապարակման համաձայն` 2 զինվորական մահացել է հիվանդության հետևանքով, 2-ը ինքնասպան է եղել, 2-ը` դժբախտ պատահարի հետևանքով, 1-ը սպանվել է զինակից ընկերոջ կողմից: Ադրբեջանական զինված ուժերի հրապարակած տվյալների համաձայն` այս տարի վիրավորվել է ադրբեջանական բանակի 2 զինվորական, իսկ Կասպյան ռազմական ինստիտուտի հաղորդմամբ` վիրավորների թիվն ավելի մեծ է եղել: Ադրբեջանի պաշտպանության նախարարությունը զոհվածների և վիրավորների վերաբերյալ որևէ վիճակագրություն չի հրապարակել: