«Եվրատեսիլի» դիտման համար ոչ պիտանի տեղի մոտ 2 000 տոմս են վաճառել

«Եվրատեսիլ 2017» մրցույթի կազմակերպիչները գոյություն չունեցող կամ դիտման համար անպիտան տեղերի շուրջ 2000 տոմս են վաճառել: Այս մասին «Մայրաքաղաքի ձայն» ռադիոկայանի եթերում պատմել է «Concert.ua» տոմսերի վաճառքի ծառայության ղեկավար Դմիտրի Ֆելիքսովը:  Նրա խոսքով՝ այդպիսի բան է եղել, քանի որ տոմսերի իրացումը սկսվել է նախքան մրցույթի համար հարթակի կառուցման ավարտը: Շինարարության ընթացքում դահլիճում հանդիսատեսի տեղերը փոխվել են: Հարթակի կառուցումից հետո պազվել է, որ որոշ տեղեր հնարավոր չէ տեղադրել սկզբնական նախագծի համաձայն: «Այն բանից հետո, ինչ ընտրվել է կապալառուն և դահլիճում տեսախցիկներ են տեղադրվել, պարզվել է, որ որոշ տեղեր չեն կարող լինել այնտեղ, որտեղ նախատեսված է: Այդ պատճառով գնված որոշ տոմսերի տեղերից կա՛մ չի երևում, կամ տեսադաշտը սահմանափակ է, կա՛մ դրանք ընդհանրապես չկան»,- ասել է Ֆելիքսովը: Այժմ գնորդներին առաջարկում են կամ փոխել տոմսերը, կամ վերադարձնել գումարը: Նշենք, որ «Եվրատեսիլ 2017»-ը կանցկացվի Կիևում: Մրցույթի կիսաեզրափակիչները տեղի կունենան մայիսի 9-ին և 11-ին, եզրափակիչ փուլը՝ մայիսի 13-ին: