Թուրքիայի դիրքորոշման մեղմացումը բոլորին ձեռնտու կլիներ. Ժիրինովսկին՝Հայոց ցեղասպանության ճանաչման մասին

«Հայոց ցեղասպանության ճանաչման հարցում Թուրքիայի դիրքորոշման մեղմացումը բոլորին ձեռնտու կլիներ: Ինձ հասկանալի չէ, թե ինչու են թուրքերն այդպես սևեռվել այդ հարցի վրա: Վաղուց կարող էին մեղմել իրենց դիրքորոշումը, առավել ևս, որ դժվար է մերժել Օսմանյան կայսրությունում քրիստոնյաների, նախևառաջ՝ հայերի սպանությունը: Եթե Անկարան մեղմեր դիրքորոշումը, վաղուց տեղի կունենար Հայաստանի հետ լավ հարաբերությունների վերականգնումը, չէ՞ որ դա բոլորին է ձեռնտու, Հայաստանի համար՝ թուրքական երկաթուղային ճանապարհներով Եվրոպայի հետ ուղիղ կապ ունենալու տեսանկյունից: Այսինքն՝ շահավետ է զուտ կոմերցիոն տեսանկյունից»,- РУСАРМИНФО-ի լրագրողի հարցերին պատասխանել է Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին Քաղաքական գործչի կարծիքով՝ երկու ժողովուրդների հաշտեցման հարցին հարկավոր է մոտենալ աստիճանաբար, և Անկարայի կողմից ցեղասպանության ճանաչման հարցին նախորդում են մի շարք այլ նախաձեռնություններ: «ԱՄՆ-ում Հայոց ցեղասպանությունը ճանաչել են գրեթե բոլոր նահանգները, բազմիցս բարձրաստիճան անձինք, այդ թվում և ԱՄՆ նախագահները, խոսել են այդ հարցում հաջակցություն հայերի: Դաշնային մակարդակում ճանաչման բացակայությունը կապված է նրա հետ, որ Թուրքիան ԱՄՆ-ի համար կարևոր դաշնակից է Մերձավոր Արևելքում, և ամերիկացիները չեն ցանկանում մտնել Անկարայի համար նման զգայուն հարցի մեջ: Այլ խոսքով՝ այդ ճանաչումը դե ֆակտո կայացել է, բայց դե յուրե ամերիկացիները հաշվարկում են իրենց շահերը»,- ասել է նա։