Իսրայելի նախկին վարչապետը բանտարկվել է

Իսրայելի նախկին վարչապետ Էհուդ Օլմերտը երկուշաբթիից կսկսի պատիժը կրել Թել Ավիվի «Մաասիյագու» բանտում, հայտնում է RIA Novosti-ն: Նա դատապարտվել է մեկուկես տարվա ազատազրկման Երուսաղեմում «Հոլիլենդ» էլիտար բնակելի համալիրի կառուցմանն աջակցելու նպատակով կաշառք վերցնելու համար: 70-ամյա նախկին քաղաքական գործչի պատժաժամկետին ևս մեկուկես ամիս ավելացրել են այն բանի համար, որ նա կոռուպցիոն մեղադրանքների նախաքննական փուլում իր օգնական Շուլա Զակենին համոզել է իր դեմ վկայություն չտալ և նրան լռության համար գումար է առաջարկել: Օլմերտը Իսրայելի կառավարությունը ղեկավարել է 2006 թվականից` այն բանից հետո, երբ նախորդ վարչապետ Արիել Շարոնը կաթված է ստացել և ընկել կոմայի մեջ: Երեք տարվա ղեկավարման ընթացքում նա վերսկսել է պաղեստինցիների և Սիրիայի հետ խաղաղ բանակցությունները: Կոռուպցիոն սկանդալների պատճառով Օլմերտը 2008 թվականի սեպտեմբերին հրաժարական է տվել, սակայն շարունակել է վարչապետի պարտականությունները կատարել մինչև 2009 թվականի մարտը, որից հետո նրան փոխարինել է ներկայիս վարչապետ Բենիամին Նեթանյահուն: