Օրենքը չի արգելում սեփական ընտրազանգվածը մոբիլիզացնելը. Աշոտյանը՝ քաղաքացիներին տրանսպորտով ընտրատեղամասեր տեղափոխելու մասին

Քաղաքական ուժի կողմից իր ընտրազանգվածի մոբիլիզացիայի որևէ արգելք Ընտրական օրենսգրքում դրված չէ: «Որևէ ընտրական օրենսդրություն չի արգելում որևէ քաղաքական ուժի՝ մոբիլիզացնել սեփական ընտրազանգվածը։ Մոբիլիզացնել՝ նշանակում է՝ օրենքով չարգելված կարգով լավագույն պայմանները ստեղծել, որպեսզի իրենց պոտենցիալ ընտրողները մասնակցեն ընտրություններին»,- այսօր ՀՀԿ կենտրոնական շտաբում լրագրողների հետ հանդիպման ընթացքում այս մասին ասաց ՀՀԿ փոխնախագահ Արմեն Աշոտյանը։ Նրա համոզմամբ՝ նույնիսկ ծայրահեղ ընդդիմադիրներն ընդունեցին այն փաստը, որ ընտրողի կամքը վերահսկել հնարավոր չէ. «Այս տեսանկյունից մեր քաղաքացիների համար ստեղծված են լավագույն պայմանները, որպեսզի, եթե նրանց վրա որևէ ճնշում կամ ներգործության փորձեր լինեն, կարողանան իրականացնել իրենց ընտրությունն այնպես, ինչպես ցանկանում են»։