Տեր-Պետրոսյանի «առաջին ծիծեռնակները» Բաքվից
Լևոն Տեր-Պետրոսյանի հայտնի երկու հեռուստաելույթները հասել են իրենց «նպատակին»: Ադրբեջանից ակտիվորեն և ոգևորված արձագանքում են: Լեռնային Ղարաբաղի հակամարտությունն Ադրբեջանի ներքին գործն է և միջազգային ոչ մի կազմակերպություն կամ երկիր չի կարող միջամտել: Նման հայտարարությամբ հանդես է եկել Ադրբեջանի նախագահ Իլհամ Ալիևը զինվորականների հետ հանդիպմանը, որը կայացել է հակամարտության էսկալացիայի տարելիցի կապակցությամբ: «Հայաստանը 2016թ. ապրիլյան բախումների ժամանակ դիմել է միջազգային կազմակերպություններին և առանձին երկրներին՝ խնդրելով դադարեցնել բախումները»,-ասել է Ալիևը՝ շեշտելով, որ ԼՂ հակամարտությունը «մեր ներքին խնդիրն է և ներքին գործը»: Ալիևը նաև հայտարարել է, որ «միջազգային ոչ մի կազմակերպություն կամ երկիր չի կարող միջամտել Ադրբեջանի ներքին գործերին»: Անդրադառնալով ՀՀ առաջին նախագահ Լևոն Տեր-Պետրոսյանի՝ զիջումներ անելու վերաբերյալ հնչեցրած հայտարարությանը՝ Ալիևն ասել է, թե իրավիճակի առավել «պրագմատիկ» նայող հայերը հրապարակավ ասում են, եթե Ադրբեջանի հետ հարաբերությունները չկարգավորվեն, Հայաստանը ապագա չի ունենա։ «Ես բազմիցս ասել եմ, որ Հայաստանի՝ որպես պետություն, գոյության միակ ճանապարհը հարևանների հետ հարաբերությունների կարգավորումն է։ Դրա համար մի ճանապարհ կա․ հայկական զորքերը պետք է անհապաղ և առանց որևէ նախապայմանների պետք է դուրս բերվեն Ադրբեջանի գրավյալ տարածքներից»,-նշել է Ալիևը։ Ահա, միջազգային հանրության վրա հույս դրած` Տեր-Պետրոսյանին պատասխանող Ալիևի արձագանքը: Առաջին նախագահը Հայաստանում քարոզ է անում, թե զիջենք ամեն ինչ, միջազգային միջնորդները կպահեն Ղարաբաղը, Ալիևն անմիջապես հակադարձում է` ոչ մի միջազգային հանրություն, Ղարաբաղն իր ներքին գործն է, ասել կուզի` ինչ կուզենա, այնպես էլ կվարվի ղարաբաղցիների հետ` նույնիսկ ԼՂ խնդրի լուծումից հետո: Իհարկե, Ադրբեջանը ոգևորված է, որ Հայաստանի առաջին նախագահից են հնչում` «եթե չզիջենք, լավ չենք ապրի» ոճով հայտարարություններ: Հենց դա էլ նրանց պետք է: Մանավանդ հիմա, երբ միջնորդները փորձում են նոր բանակցություններ կազմակերպել: Տեր-Պետրոսյանն իր հայտարարություններով հասավ նրան, որ առաջիկա բանակցություններում հայկական կողմի «բերանը փակելու» է հենց Ալիևն, ասելով` «նույնիսկ ձեր երկրի առաջին նախագահն է հասկանում, որ օկուպացված տարածքները պետք է վերադարձնեք...» Ալիևը միակը չէ, որը գնահատել է Տեր-Պետրոսյանի «խաղաղասիրական» ելույթները: Ոգևորված է նաև Ադրբեջանի նախկին նախագահը Այազ Մութալիբովը: Նա էլ անդրադարձել է Լևոն Տեր-Պետրոսյանի՝ «Կենտրոն» հեռուստաընկերությանը տված հարցազրույցին: «Տեր-Պետրոսյանին գիտեմ որպես պրագմատիկ մարդ, և եթե նա նման հայտարարություններ է անում, նշանակում է՝ հասկանում է, որ Հայաստանի զարգացման ուղին անցնում է Ադրբեջանի հետ խաղաղության միջով»,-ասել է Մութալիբովը haqqin.az-ին տված հարցազրույցին: Ադրբեջանի նախկին նախագահի խոսքով՝ «խաղաղություն պետք է երկու կողմերին էլ և զուր չէ, որ Տեր-Պետրոսյանը նման մեսիջ է ուղարկում հայ ժողովրդին»: «Եթե նա մեզ ձեռք է մեկնում, չպետք է մերժենք այն»,-ասել է Մութալիբովը և նշել, որ Հայաստանի և Ադրբեջանի ժողովուրդները պետք է առաջ նայեն, մտածեն երկրների, տարածաշրջանի բարօրության մասին: «Այլընտրանք մենք չունենք. կամ մենք հավետ թշնամություն ենք անելու, կամ պետք է ուժ գտնենք՝ խաղաղության շուրջ պայմանավորվելու համար»,-հավելել է նա: «Միշտ կարծել եմ և կարծում եմ, որ խաղաղ գոյակցությունն այլընտրանք չունի: Այստեղ քաղաքական կամք է պետք և՛ մեր կողմից, և՛ հայկական կողմից, որպեսզի այս ցավոտ խնդիրը լուծենք: Ոչ մեկ չի լուծի այս խնդիրը մեր փոխարեն. ո՛չ ԵԱՀԿ Մինսկի խումբը, ո՛չ ուրիշ մի խումբ: Մենք բոլորս պետք է մեր ժողովուրդներին խաղաղության պատրաստենք»-ասել է Ադրբեջանի նախկին նախագահը: Նույնիսկ հիմա, երբ կողմերը հեռու են կարգավորումից` Ադրբեջանի ներկա և նախկին ղեկավարները, Տեր-Պետրոսյանին բաց հասկացնում են, որ նրա շտապողականությունը լուծման հարցում միանգամայն ճիշտ է, բայց խնդիրը` ԵԱՀԿ Մինսկի խումբը չէ լուծողը, այլ... Այլ` Ադրբեջանը: Այսինքն` «կվերադարձնեք Ղարաբաղը», իսկ մնացածը` «մեր գործն է»... Ահա, թե ինչի հասավ Տեր-Պետրոսյանը: Հայաստանում դեռ ոչ ոք չէր նսեմացրել ԵԱՀԿ Մինսկի խմբի նշանակությունը, բայց ՀՀ առաջին նախագահի ելույթը ծառայեց նաև դրան, այժմ Ադրբեջանը յուրովի է մեկնաբանում նրա ելույթի առանձին դրվագներ... Մետաքսյա Շալունց
Հետևեք մեզ Viber-ում
