Այս անգամ «հետընտրական գործընթացները», դժվար թե, ձգվեն 2-3 շաբաթից ավելի
«Առավոտ»-ի խմբագիր Արամ Աբրահամյանը գրել է.«Ես չգիտեմ, թե ինչպես են ավարտվելու ընտրությունները, բայց մի բան կարող եմ հաստատ ասել՝ հաջորդ 5 տարին ընդդիմադիր քաղաքական ուժերի մի մասը պայքարելու է ընտրությունների արդյունքները չեղյալ ճանաչելու և արտահերթ ընտրություններ անցկացնելու համար: Այսինքն` մոտակա 5 տարվա նրանց «աշխատանքի ճակատն» ապահոված է: Խիստ կասկածում եմ, որ այս անգամ «հետընտրական գործընթացները» հնարավոր լինի ձգել 2-3 շաբաթից ավելի, դրանից հետո այն ուժերի ներկայացուցիչները, որոնք դժգոհ կմնան ընտրությունների արդյունքներից, բայց անցել են 5 կամ 7 տոկոսի շեմը, կվերցնեն իրենց մանդատները և պայքարը կտեղափոխեն խորհրդարան: Նրանք, ովքեր այդ շեմը չեն հաղթահարելու, իհարկե, ավելի ակտիվ կլինեն և կպահանջեն նոր ընտրություններ: Այսպիսով՝ քաղաքական ուժերի անելիքներն առաջիկա հնգամյակում քիչ թե շատ պարզ են՝ այստեղ որևէ սենսացիոն զարգացումներ չեն սպասվում: Ինձ ավելի շատ հետաքրքրում է, թե ինչ պետք է անենք մենք՝ ակտիվ և ոչ անտարբեր քաղաքացիներս: Ես կառաջարկեի կենտրոնանալ կրթության վրա՝ փոխել մեր կրթության խորհրդային համակարգը՝ սկսած մանկապարտեզից: Սա, իմ կարծիքով, նույնքան ռազմավարական ուղղություն է, որքան՝ բանակը: Ինչ է ցույց տվել այս ընտրարշավը: Որ կա մի քանի հարյուր երիտասարդ, որոնք ապրում են 21-րդ դարի քաղաքակիրթ աշխարհի արժեքներով, կան մի քանի տասնյակ քաղաքական գործիչներ, որոնք իրենց մտածելակերպով մեծ մասամբ մնացել են դեռևս 90-ականների կեսերին, և կա հարյուր հազարավոր իներտ, անտարբեր, անհաղորդ, փնթփնթան զանգված, որը բացի բողոքելուց և մեծահարուստների կամ իշխանավորների ձեռքին և գրպանին նայելուց, ոչ մի այլ բանի ընդունակ չէ: «Խնդրենք Վլադիմիր Վլադիմիրովիչին, որ նա հայ ազգին լավ նայի»՝ ահա այդ զանգվածին հակիրճ բնութագրող մաղթանքը»: Շարունակությունը՝ թերթի այսօրվա համարում:
Հետևեք մեզ Viber-ում
