Նախկինում հաշիվներ են ունեցել. մանրամասներ Դեղձուտ գյուղում տեղի ունեցած միջադեպից

Արարատի մարզում պատգամավորի ՀՅԴ–ական թեկնածու Բագրատ Սարգսյանը պնդում է, որ մարզի Դեղձուտ գյուղում համագյուղացու կողմից իր քրոջ որդու՝ 30-ամյա Հովիկ Նազարփուրի դանակահարությունը քաղաքական ենթատեքստ չունի։ Yerkir.am-ի հետ զրույցում նա վստահեցրել է, որ միջադեպը տեղի է ունեցել կենցաղային հողի վրա։ «Երիտասարդ տղաներ են, նախկինում միմյանց հետ հաշիվներ են ունեցել, քեֆները լավ է եղել, իրար չեն հասկացել, վիճել են: Ոչ շտաբում է եղել դեպքը, ոչ էլ վեճի ընթացքում քաղաքական պատկանելության կամ ընտրությունների հետ կապված խոսակցություն է եղել: Տուժողը բողոք չունի, միջադեպը հարթվել է»,- ասել է Սարգսյանը: Բագրատ Սարգսյանը հերքել է տեղեկությունը, թե վիճաբանության ժամանակ Նազարփուրը հանդիմանել է համագյուղացուն՝ ՀՀԿ-ական Ալիկ Սարգսյանի՝ Դեղձուտ գյուղում ընտրողների հետ հանդիպմանը ներկա գտնվելու համար։ «Ես ու Ալիկ Սարգսյանը համադասարանցիներ ենք եղել, նույն գյուղից ենք, իրար հետ նորմալ հարաբերություններ ունենք, վեճի ընթացքում նրա անունը չի շոշափվել, վեճն ընդամենը կենցաղային հողի վրա է եղել»,– ասել է պատգամավորի թեկնածուն։