4 պատգամավորների նկատմամբ կարգապահական միջոցներ կկիրառվեն

Ազգային ժողովի էթիկայի հանձնաժողովը որոշում է ընդունել «Մեդիա և իրավունք»-ի դիմումի մասով։ Նրանց պահանջն էր պատժել այն պատգամավորներին, որոնք քվեարկել են ուրիշի փոխարեն։ Որոշման համաձայն՝ պատգամավորներ Արտակ Դավթյանը, Վազգեն Կարախանյանը, Ռազմիկ Զոհրաբյանը և Արկադի Համբարձումյանը թույլ են տվել Կանոնակարգի 6.1-րդ հոդվածի 2-րդ մասի «ա» և գ» կետերով նախատեսված էթիկայի կանոնների խախտում: Հանձնաժողովը որոշման երկրորդ կետով դիմել է ԱԺ նախագահին՝ առաջարկելով կարգազանց համարել պատգամավորներին և նրանց նկատմամբ կիրառել կարգապահական միջոց: Որոշման մեջ ասվում է․ «Հայաստանի Հանրապետության Ազգային ժողովի էթիկայի հարցերով ժամանակավոր հանձնաժողովը՝ (այսուհետ՝ Հանձնաժողով) կազմով. Սուքիաս Ավետիսյանի (նախագահող), Թևան Պողոսյանի, Վահրամ Մկրտչյանի և Կարեն Շախմուրադյանի, համաձայն «Ազգային ժողովի կանոնակարգ» Հայաստանի Հանրապետության 2002 թվականի փետրվարի 20-ի ՀՕ-308 օրենքի (այսուհետ՝ Կանոնակարգ) 24.2-րդ հոդվածի 1-ին մասի «բ» կետի, 24.4-րդ հոդվածի և Հանձնաժողովի կանոնակարգի 12-րդ գլխի, դռնփակ նիստում քննեց «Մեդիա և իրավունք» հասարակական կազմակերպության (այսուհետ՝ Դիմող) դիմումի (այսուհետ՝ Դիմում) գործով զեկուցող՝ պատգամավոր Թևան Պողոսյանի ներկայացրած սույն որոշման նախագիծը: Ուսումնասիրելով Դիմումը և գործում առկա նյութերը, Հանձնաժողովը ՊԱՐԶԵՑ. 1. Դիմումը վերաբերվում է թիվ 078 ընտրատարածքի պատգամավոր Արտակ Դավթյանի, թիվ 067 ընտրատարածքի պատգամավոր Վազգեն Կարախանյանի, թիվ 045 ընտրատարածքի պատգամավոր Ռազմիկ Զոհրաբյանի և թիվ 029 ընտրատարածքի պատգամավոր Արկադի Համբարձումյանի կողմից այլ պատգամավորների փոխարեն քվեարկելուն: Ըստ Դիմողի՝ նշված պատգամավորները խախտել են Կանոնակարգի 6.1-րդ հոդվածի 2-րդ մասի «ա» (հարգել օրենքը և ենթարկվել օրենքին) և «գ» (պահպանել Ազգային ժողովի և նրա հանձնաժողովների նիստերի անցկացման կարգը) կետերով նախատեսված էթիկայի կանոնները: Դիմողն իր պնդումները հիմնավորում է Դիմողն իր պնդումները հիմնավորում է (https://mediaandlawngo.blogspot.am/2016/12/4.html https://mediaandlawngo.blogspot.am/2016/12/blog-post_16.html https://mediaandlawngo.blogspot.am/2016/12/blog-post_56.html https://mediaandlawngo.blogspot.am/2016/12/blog-post_93.html) կայքի համապատասխան հղումներով և խնդրում է Հանձնաժողովին որոշում կայացնել ՀՀ Ազգային ժողովի պատգամավորներ՝ Արտակ Դավթյանի, Վազգեն Կարախանյանի, Ռազմիկ Զոհրաբյանի և Արկադի Համբարձումյանի կողմից Կանոնակարգի 6.1-րդ հոդվածով նախատեսված էթիկայի կանոնները խախտելու վերաբերյալ: 2. 2017 թվականի փետրվարի 1-ին Հանձնաժողովը կայացրել է «Մեդիա և իրավունք» հասարակական կազմակերպության 26.01.2017թ. N2-101 դիմումի քննությունը սկսելու վերաբերյալ» թիվ Է-2/17 որոշումը, որով հարցի քննարկման և դրա վերաբերյալ Հանձնաժողովին եզրակացություն ներկայացնելու նպատակով Հանձնաժողովի ներկայացուցիչ է նշանակվել պատգամավոր Թևան Պողոսյանը: 3. Կանոնակարգի 24.4-րդ հոդվածի 1-ին մասի «ը» կետի համաձայն՝ սույն գործով Հանձնաժողովի որոշման նախագիծը և գործին առնչվող նյութերն ուղարկվել են պատգամավորներ Արտակ Դավթյանին, Վազգեն Կարախանյանին, Ռազմիկ Զոհրաբյանին և Արկադի Համբարձումյանին, սակայն Հանձնաժողովի կողմից սահմանված ժամկետում դրանց վերաբերյալ որևէ պարզաբանում և դիրքորոշում չի ներկայացվել: 4. Ուսումնասիրելով գործին առնչվող բոլոր նյութերը, այդ թվում՝ տեսաձայնագրությունները, Հանձնաժողովը գտնում է, որ Դիմումում նշված պատգամավորները, քվեարկելով այլ պատգամավորների փոխարեն, խախտել են Կանոնակարգի 61-րդ հոդվածի 5-րդ մասը, որի համաձայն՝ «Պատգամավորը քվեարկում է անձամբ՝ կողմ, դեմ, ձեռնպահ, կամ կարող է սույն օրենքի 99-րդ հոդվածի 3-րդ կետի «դ» կամ «ե» ենթակետերով նախատեսված կարգով հրաժարվել քվեարկությանը մասնակցելուց:»: Վերոգրյալի հիման վրա` Հանձնաժողովը գտնում է, որ Հայաստանի Հանրապետության Ազգային ժողովի պատգամավորներ Արտակ Դավթյանը, Վազգեն Կարախանյանը, Ռազմիկ Զոհրաբյանը և Արկադի Համբարձումյանը խախտել են Կանոնակարգի 6.1-րդ հոդվածի 2-րդ մասի «ա» կետով նախատեսված էթիկայի կանոնը, այն է` հարգել օրենքը և ենթարկվել օրենքին, և «գ» կետով նախատեսված էթիկայի կանոնը, այն է` պահպանել Ազգային ժողովի և նրա հանձնաժողովների նիստերի անցկացման կարգը: Ելնելով գործի քննության արդյունքներից, ղեկավարվելով Կանոնակարգի 24.2-րդ հոդվածի 1-ին մասի «բ» կետով, 45-րդ հոդվածի 2-րդ և 3-րդ մասերով, Հանձնաժողովը ՈՐՈՇԵՑ. 1. Հայաստանի Հանրապետության Ազգային ժողովի պատգամավորներ Արտակ Դավթյանը, Վազգեն Կարախանյանը, Ռազմիկ Զոհրաբյանը և Արկադի Համբարձումյանը թույլ են տվել Կանոնակարգի 6.1-րդ հոդվածի 2-րդ մասի «ա» և «գ» կետերով նախատեսված էթիկայի կանոնների խախտում: 2. Դիմել Հայաստանի Հանրապետության Ազգային ժողովի նախագահին առաջարկով՝ Կանոնակարգի 45-րդ հոդվածի 2-րդ և 3-րդ մասերի համաձայն Հայաստանի Հանրապետության Ազգային ժողովի պատգամավորներ Արտակ Դավթյանին, Վազգեն Կարախանյանին, Ռազմիկ Զոհրաբյանին և Արկադի Համբարձումյանին համարել կարգազանց պատգամավորներ և նրանց նկատմամբ կիրառել կարգապահական միջոց: ՀԱՆՁՆԱԺՈՂՈՎԻ ՆԱԽԱԳԱՀ՝ ՍՈՒՔԻԱՍ ԱՎԵՏԻՍՅԱՆ»