18 միլիարդ եվրո կարժենա շենգենյան համաձայնագրի խզումը

Եվրահանձնաժողովը նախազգուշացրել է Եվրամիության անդամ երկրներին ներգաղթային ճգնաժամի հետ կապված սահմանային հսկողություն սահմանելու և Շենգենյան համաձայնագիրը դադարեցնելու դեպքում լուրջ ֆինանսական կորուստների մասին: Շենգենյան գոտու վերացումը կարող է արժենալ դրա անդամներին մինչև 18 միլիարդ եվրո: Այդ մասին ասված է Եվրահանձնաժողովի ներկայացրած փաստաթղթում, գրում է Deutsche Welle-ն: Մասնավորապես՝ սահմանների հսկողության ուղղությամբ լրացուցիչ միջոցները կարժենան ԵՄ երկրներին 7,1 միլիարդ եվրո: Ավելի վաղ Եվրահանձնաժողովի նախագահ Ժան-Կլոդ Յունկերը հայտարարել է, որ արդեն սահմանված սահմանափակումները կարժենան տարեկան 3 միլիարդ եվրո: Շենգենի վերացումից առաջացած անուղղակի վնասները կանդրադառնան տրանսպորտային և լոգիստիկ ճյուղերին, ինչպես նաև աշխատաշուկային: Վիզային ռեժիմի վերադառնալու պատճառով զբոսաշրջային ոլորտի տարեկան կորուստները կկազմեն 10-20 միլիարդ եվրո: Բրյուսելը և ԵՄ երկրները պահանջել են Հունաստանից ուժեղացնել միգրացիոն ճգնաժամի կանխման ուղղությամբ միջոցները: Եվրահանձնաժողովը քննադատում է Աթենքին փախստականների ընդունման և գրանցման առաջնային կենտրոնների պակասի համար: ԵՄ-ի տվյալներով՝ 2015 թվականին Հունաստան ժամանած 800 հազար ներգաղթյալներից արտաքսվել է միայն 16 հազարը։