Վահան Շիրխանյանը հայտնվել է ՔԿՀ ամենավատ ու գերխոնավ խցում՝ պաշտպանը ահազանգում է

Հիվանդանոցում հետազոտություններ անցնելուց և նորից ՔԿՀ տեղափոխվելուց հետո Վահան Շիրխանյանին տարել են ամբողջ քրեակատարողական հիմնարկում ամենավատ խուցը: Այս մասին «Փաստինֆո»-ի լրագրողին հայտնել է հանցավոր համագործակցության վերաբերյալ գործով ամբաստանյալ, ՀՀ նախկին փոխվարչապետ և Պաշտպանության նախկին փոխնախարար Վահան Շիրխանյանի պաշտպան, փաստաբան Հայկ Ալումյանը: Մասնավորապես, պաշտպանը նշել է, որ խուցը նեղ, փոքրիկ խուց է և շատ խոնավ՝ պատերի ներքևի հատվածը խոնավությունից բորբոսնել է: Այդ նեղ խցում կալանավորները չորսն են եղել, սակայն այն բանից հետո, երբ Վ.Շիրխանյանը դժգոհել է խցի պայմաններից ու վիճակից, մոտ մեկ ժամվա մեջ ևս մեկ կալանավոր են բերել խուց: Հայկ Ալումյանը համոզմունք է հայտնել, որ այս եղանակով ուզում են պատժել, վրեժխնդիր լինել Վահան Շիրխանյանից այն բանի համար, որ նա ՄԻԵԴ է դիմել և ցանկանում են այդպիսով էլ ավելի վնաս պատճառել Վահան Շիրխանյանին ու նրա առողջությանը: «Մենք ավելի ու ավելի ենք համոզվում, որ այս ամենի նպատակը մեկն է՝ հոգեպես ու ֆիզիկապես կոտրել Վահան Շիրխանյանին »,- հավելել է պաշտպանը: Փաստաբանն անդրադարձել է նաև քաղաքացիական հիվանդանոցում իր պաշտպանյալին ցուցաբերված բուժօգնությանը՝ այն, իր բնորոշմամբ, այնքան անձեռնհաս է եղել, որ անգամ ամենաժամանակակից սարքավորումների օգնությամբ հետազոտություններ անցկացնող բժիշկը չի նկատել, որ Վ.Շիրխանյանը նախկինում ինֆարկտ է տարել, երակի վրա ֆիլտր կա և որ նա առիթմիա ունի այն դեպքում, որ շտապօգնության բժիշկները իրենց տրամադրության տակ եղած սարքավորումներով այդ ամենը նկատում են: Այդ ամենի մասին համապատասխան փաստաթղթում բժիշկը գրել է Վահան Շիրխանյանի խոսքերից: «Հիվանդանոցում գտնվելու յոթ օրվա ընթացքում ահա այս որակի բուժզննում է անցել Վահան Շիրխանյանը»,- ասել է Հ.Ալումյանը: Փաստաբանը նշել է, որ մոտակա առաջին աշխատանքային օրն իսկ, այսինքն՝ վաղը, իրենք դիմելու են Մարդու իրավունքների պաշտպանի արագ արձագանքման խմբին, որպեսզի հրատապ միջոցներ ձեռնարկվեն՝ խցի այդ մեծ խոնավությունն էլ ավելի է սրելու հոդերի, ի հայտ եկած երիկամային հիվանդությունները: «Ես կուզեի, որ մի օր այդ վիճակում իրենք հայտնվեն, որ հասկանան, թե դա ինչ է նշանակում»,- ասել է Հայկ Ալումյանը: