Գաղափարական առումով մրցակցային ընտրություններ են լինելու.Արմեն Աշոտյան

Հայաստանի Հանրապետական կուսակցության փոխնախագահ Արմեն Աշոտյանը լրագրողների հետ հանդիպմանն ասաց,որ  ՀՀ խորհրդարանական ընտրություններին մասնակցող ուժերն ունեն լայն գաղափարական հորիզոն՝ գալիք ընտրություններին մասնակցելու են ինչպես կոմունիստները, այնպես էլ ծայրահեղ ազատականները, պահպանողականները, սոցիալիստները, լիբերալները, ժողովրդավարները: Հետևաբար, գաղափարական առումով ընտրությունը լինելու է մրցակցային: «Ընտրողը տեսականորեն հնարավորություն ունի ընտրելու այս կամ այն քաղաքական ուժին, հետևաբար՝ ընտրելու այս կամ այն քաղաքական գաղափարախոսությունը:Քաղաքական ուժերը փորձել են համադրել սեփական քաղաքական ամբիցիաները հասարակության ակնկալիքների հետ: Թեպետ շատ քաղաքական ուժեր չեն հրապարակել իրենց կարգախոսները, բայց կարգախոսների առաջին վերլուծությունը թույլ է տալիս փաստել, որ քաղաքական ուժերը փորձել են համադրել սեփական քաղաքական ամբիցիաները հասարակության ակնկալիքների հետ. այն, ինչ ըստ քաղաքական ուժերի՝ ակնկալում է ժողովուրդը և այն, ինչ քաղաքական ուժը հավակնում է ստանալ այս ընտրություններից: Կան քաղաքական ուժեր, որոնք շեշտը դնում են սոցիալ-տնտեսական զարգացման վրա, նաև կան ուժեր, որոնց կարգախոսները մեզ տանում դեպի անցյալ»,ասաց նա: Արմեն Աշոտյանը նշեց, որ մինչև քաղաքական ուժերի ծրագրերի հրապարակումը դժվար է ասել, թե արդյո՞ք ընտրությունը կլինի Հայաստանի զարգացման հեռանկարների մոդելների շուրջ. «Արդյո՞ք մեր ընտրողը, ծանոթանալով քաղաքական ուժերի ծրագրերին և մոտեցումներին, կկարողանա ընտրել ոչ միայն մարդկանց, ում հավանում է, այլ ընտրել նաև Հայաստանի զարգացման մոդել»,-ասաց Աշոտյանը և հավելեց, որ ընտրությունները ենթադրում են ոչ միայն անձերի ընտրություն, այլ ենթադրում են նաև երկրի զարգացման մոդելի ընտրություն: Արդեն ակնհայտ են այն ուժերը, որոնք հանուն կարճաժեմկետ էֆեկտի քաղաքական մեկ սկզբունք են հռչակում, բայց նախընտրական արշավի են գնում բացառապես ուրիշ մոտեցումներով եւ կարգախոսներով,ասաց  Արմեն Աշոտյանը: Նրա խոսքով՝ համացանցում կրկնակի աճել են ֆեյքերը: «Մենք նկատում ենք, թե որքան շատ են սեւ փիարի համար ստեղծված նյութերը: Մեր երկիրը փոքր է, մենք բոլորս հասկանում ենք, թե դա ով է անում, եւ ինչի համար է արվում: Մենք նման քայլերի չենք դիմում, բայց խիստ կպատասխանենք բոլոր նրանց, ովքեր փորձում են քաղաքական պայքարը թշնամանքի վերածել, քաղաքական պայքարը ստի եւ մանիպուլյացիաների արշավի վերածել: Մեզ թվում է, որ առաջիկա արշավն այդպիսին չի լինի, եւ ապրիլի 2-ը կդառնա Հայաստանի զարգացման մոդելների ընտրության օր»,- նշեց Աշոտյանը: