«Ո՛չ ժխտմանը». ամենամյա լուռ ակցիա հայերի մասնակցությամբ

Կալիֆոռնիայի պետական համալսարանի (Նորթրիջ, CSUN) ուսանողները լուռ նստացույց են արել «Ո՛չ ժխտմանը» ամենամյա լուռ բողոքի ակցիայի շրջանակում։ Այս մասին հայտնում է Sundial-ը։ Ուսանողների ձեռքերին եղել են պաստառներ՝ «Դաստիարակի՛ր, պաշտպանի՛ր, փոխի՛ր», «Չպատժված հանցանքը խրախուսված հանցանք է» գրություններով։ Հայ ուսանողների ասոցիացիան նման միջոցառումներ է անցկացնում տարիներ շարունակ՝ բարձրացնելու համար 1915թ. Հայոց ցեղասպանության վերաբերյալ ուսանողների իրազեկվածությունը և նրանց ներգրավելու փոխհատուցման անհրաժեշտության արտահայտման հարցերին։ Համալսարանի հայ ուսանողների ասոցիացիայի նախագահ Քրիստին Դեշդեմիրյանի խոսքով՝ համալսարանն ունի Հայաստանից դուրս ամենամեծ թվով հայ ուսանողները։ «Համալսարանական ավանի 42 հազար մարդուց մոտ 8-10 տոկոսը ծագումով հայ է»,- ասել է նա։ «Սա մեր տարբերակն է՝ ցույց տալու, որ մենք այստեղ ենք, մենք հպարտ ենք, որ հայ ենք, և ահա սա է ավելի քան 100 տարի առաջ տեղի ունեցածը»,- ասել է Դաշդեմիրյանը՝ հավելելով, որ կլոր տարին իրեն պայքարում են ճանաչման համար։ Ցուցարարներն իրենց բերանները կապել են «ժխտում» գրությամբ երիզակներով։ Նրանք կարծում են, որ լռությունն այս դեպքում ավելի զորեղ է։ «Երիզակը ներկայացնում է, թե ինչպես է մեզ վրա ավելի քան 100 տարիների ընթացքում ազդել լռությունը»,- ասել է ասոցիացիայի փոխնախագահ Հակոբ Հովհաննիսյանը՝ նշելով, որ Թուրքիան թույլ չի տալիս ԱՄՆ-ին խոսել կամ օգտագործել «Ցեղասպանություն» բառը՝ իր ռազմաբազաների շնորհիվ։ Լուռ ակցիայից բացի՝ ուսանողները գտել են նաև իրենց մեսիջի տարածման այլ եղանակներ. #StainOfDenial, #ArmenianGenocide և #ourwoundsarestillopen հեշթեգներն ակտիվորեն շրջանառվում են սոցցանցերում։ «Եթե մենք կարողանանք դաստիարակել մարդկանց անցյալում տեղի ունեցածի հիման վրա, ապագայում նույն սխալները տեղ չեն գտնի»,- ասել է Հովհաննիսյանը՝ նշելով, որ իրենք ունեն լայն ներգրավվածության կարիք՝ անկախ ազգությունից։