Թաղի տղերքի, քրեական հեղինակությունների ընտրություններ չեն.Արթուր Բաղդասարյան

ՀՎԿ 2-րդ համագումարի մեկնարկին  Կուսակցության նախագահ Արթուր Բաղդասարյանը դահլիճ մտավ ծափողջյունների ներքո: Իր ելույթում նա հայտարարեց,որ այս ընտրություններին ՀՎԿ-ն մասնակցում է կազմուպատրաստ. «Այնպիսի ծրագրեր ենք առաջարկելու, որ մեր երկիրը դուրս հանենք այս խորագույն փոսից։ Մեր թշնամիներն ու հակառակորդներն անգամ արձանագրում են, որ մենք այն ուժն ենք, որ կարողանում ենք հաղթանակել։ Մանր-մունր քարերը մեր ճանապարհին առ ոչինչ են։ ՀՀ-ն այսօր նոր թռիչքի կարիք ունի, հերիք է մեր մեջքը կռացած ապրենք։ 20 տարի ՕԵԿ-ը հաղթել է ու եղել ԱԺ-ում։ Մենք ներկայացնելու ենք այս անգամ խիստ պրագմատիկ, իրատեսական ծրագիր»: «Սա թաղի տղերքի, քրեական հեղինակությունների ընտրություններ չեն։ ԸՕ-ն լաց է լինում որոշների համար։ Մենք ոչ ենք ասում մարզերում զանգվածային ցուցակագրումներին, պետք է իմանալ, որ ընտրակաշառքով ձեռք բերված քվեով նրանք դատապարտում են իրենց ընտանիքը:ՀՎԿ հաղթանակը, նշանակում է պրոֆեսիոնալ բանակի ստեղծում:Մենք միշտ ասել ենք, որ 18 տարեկան երեխան չպետք է ծառայի, այլ պետք է լինի վարձատրվող, պրոֆեսիոնալ բանակ, կողոպուտը պետք է վերացնել։ Ավանդների վերադարձ։ Այսօր 82 հազար մարդ ստացել է իր ավանդը՝ ավելի քան 40 մլն դոլար»: «Բնական հանածոները պետք է պետականացվեն:Այսօր դրանք անխնա հարստահարվում ու բռնաբարվում են որոշ մարդկանց կողմից:Ժողովեք ձեր ինքնասիրությունը. այսօր մեր հայ կանայք Թուրքիայում բանտարկվում են, քանի որ զբաղվում են անբարոյականությամբ։ Դուք բոլորդ ինձ ճանաչում եք, դուք իմ զորքն եք, կաշիներդ կքերթեմ, եթե լավ չաշխատեք»: Վերջում նա ասաց իրենց կարգախոսներից մեկը` «Քվեարկիր հանուն փոփոխության, քվեարկիր հանուն հայկական վերածննդի»,-ասաց նա: