Իրավիճակ է փոխվել.Արամ Հարությունյանը կառաջադրվի ռեյտինգայինով

Կոտայքի նախկին մարզպետ, բնապահպանության նախկին նախարար Արամ Հարությունյանը՝ Բուլքի Արամը, մեր տեղեկություններով խորհրդարանական ընտրություններին հարազատ մարզում կառաջադրվի ռեյտինգային ընտրակարգով: Իսկզբանե Բուլկին ցանկություն է հայտնել  ստանձնել մարզում ՀՀԿ-ականների աշխատանքի կուրացիան, հիշեցնենք, որ նա Կոտայքի ՀՀԿ մարզային կառույցի ղեկավարն է, սակայն ՀՀԿ վերնախավում որոշում են կայացրել, որ նա մյուս ռեյտինգայինների պես պետք է թեկնածություն առաջադրի եւ ցույց տա իր կշիռը, թե որքան ձայն կարող է հավաքել հարազատ կուսակցության համար: Որպեսզի հետագայում նա թիմային աշխատանքը ամբողջովին չվերագրի իրեն եւ մեծամեծ պահանջներ ներկայացնի կուսակցությանը: Հատկապես, որ Հարությունյանի հայրենի Եղվարդում եւ շրջակայում ՀՀԿ-ն առանձնապես մրցակցային թեկնածու չունի: Ինչ-որ անհայտ թեկնածուի մասին է խոսք եղել, բայց ի վերջո որոշվել է, որ հենց Արամ Հարությունյանն էլ պետք է մտնի ընտրական պրոցեսի մեջ: Ի դեպ,  ընտրությունների արդյունքներով պայմանավորված չի բացառվում, որ նրան կրկին վստահեն մարզպետի պաշտոնը: Նշենք, որ Կոտայքում ՀՀԿ-ի ռեյտինգային ցուցակում կլինեն նաեւ պատգամավորներ Վարդան Այվազյանն ու Արտակ Դավթյանը, առաջինը կլինի Չարենցավանի եւ հարակից բնակավայրերի ձայն հավաքողը, երկրորդը՝Աբովյանի: Քննարկվում է նաեւ Բարսեղ Բեգլարյանի՝Ֆլեշի Բարսեղի սանիկի թեկնածությունը: Ինչպես նաեւ  Չարենցավանում գործող «Ասկե գրուպ» ընկերության ղեկավար Վահան Հարությունյանի թեկնածությունը։ Վերջինս Սերժ Սարգսյանի ընկեր, գործարար Միշա Հարությունյանի որդին է եւ ԴԱՀԿ ծառայության նախկին ղեկավար Միհրան Պողոսյանի զարմիկը։ Սակայն վերջինին ամենայն հավանականությամբ Սերժ Սարգսյանը համամասնական ցուցակում կտեղավորի, քանի որ նա Չարենցավանի լայն հասարակության կողմից այնքան էլ ընդունված չէ, իսկ Սերժ Սարգսյանը ցանկանում է նրան տեսնել խորհրդարանում: