Դու կգաս ու կրկին հեքիաթով կդյութես... Այսօր Վահան Տերյանի ծննդյան օրն է
Այսօր լրանում է հայ անվանի բանաստեղծ Վահան Տերյանի ծննդյան 131 ամյակը: Վահան Տերյան (իսկական անունը՝ Վահան Սուքիասի Տեր-Գրիգորյան). Ստորև ներկայացնում ենք Տերյանի բանաստեղծություններից մի քանիսը... * * * Դու կգաս ու կրկին հեքիաթով կդյութես, Լուսերես կըցրես մառախուղն իմ հոգու, Ոսկեշող հայացքով և քնքուշ խոսքերով, որ գիտես միայն դու։ Կըփարվես մեղմորեն, կըփռես, կըվառես անթառամ Կուսական աշխարհիդ ծաղիկներն անծանոթ, Կընստենք իրար մոտ, և հեռու կլինի առօրյան միաձայն ու աղոտ։ Սև թախիծն՝ իմ սրտից, մութ խոհերն՝ իմ հոգուց կըգնան Լույսիդ դեմ կըցրվեն ըստվերները մռայլ, Տառապանքը քեզ հետ՝ քաղցր հուշ, և խոսքերը՝ խորհուրդ կըդառնան, կըհագնեն ուրիշ փայլ։ Մթագին գիշերում, աշխարհում մթամած, խավարում, Կըվառենք չմեռնող, չմարող կըրակը մեր հոգու, Մեր ողջույնը սիրով կընետենք և՛ մարդկանց, և՛ երկրին, և՛ հեռուն ես ու դուն։ * * * Այսօր դու քաղցր ես նայում, առավո’տ, Եվ դյութական է համբույրը քո զով, Եվ լայն է բացված հեռուն արևոտ, Ու գինով եմ ես մի նոր երազով… Ելնել ճանապարհ, խնդուն հեռանալ, Զվարթ և թեթև թափառել ազատ, Եվ ո՛չ հայրենիք, ո՛չ տուն ունենալ, Ո՛չ անուն, ո՛չ զենք, ո՛չ փառք, ո՛չ արծաթ… Սիրել ու կրկին սիրել խնդագին, Փայփայել քնքուշ, լինել հարազատ, Հեռանա~լ, դառնա~լ կրկին ու կրկին, Անհուն աշխարհում բացսիրտ և ազատ։ Ողջունել սիրով անց ու դարձողին, Օրհներգել կյանքը, աշխարհին ժպտալ, Հարազատ լինել ջրին ու հողին Եվ անհուն սիրով սիրել ու գթալ… Մութ հավերժության դառնությունն զգալ,–– Եվ թախծել անհուն և անչար լինել,— Մեռնող մանկան մոտ դառը հեկեկալ, Բաց շիրմի առաջ ողջ կյանքը օրհնել… Մեռնել անտրտունջ հնազանդության Մեղմագին երգով, ժպիտով քնքուշ. — Զգալ, որ ողջը հեքիաթ է միայն, Ցնորք է անվերջ, երազ է անուշ… * * * Գարնան անուշ աղմուկով, Գարնան երգով դու եկար. Փայլով, փառքով ու շուքով, Խնդությունով խելագար…. Սիրտըս անուշ խոցեցիր Արևավառ քո սրով, Սև օրերըս այրեցիր Գեղեցկությամբ ու սիրով։ Սիրտըս լիքն էր մութ մեգով, Սիրտըս թույլ էր ու տկար,— Գարնան անուշ աղմուկով, Գարնան երգով դու եկար…
Հետևեք մեզ Viber-ում
